გლდანის მეთვრამეტე სამკურნალო დაწესებულებაში მიხეილ სააკაშვილის მოსანახულებლად უკრაინის საელჩოს წარმომადგენელი მივიდა. სააკაშვილთან ასევე იმყოფებიან მისი პირადი ექიმი ნიკოლოზ ყიფშიძე, უფლებადამცველი ნიკა გვარამია და „ნაციონალური მოძრაობის” წევრი ეკა ხერხეულიძე.

არსებული ინფორმაციით, ისინი მიხეილ სააკაშვილთან ერთად განიხილავენ გორის ჰოსპიტალში გადაყვანის საკითხს.

ცნობისთვის, „ნაციონალური მოძრაობის“ წევრის, ეკა ხერხეულიძის ინფორმაციით, მიხეილ სააკაშვილმა მოითხოვა, რომ მასთან ნიკა გვარამია და უკრაინის საელჩოს წარმომადგენელი მისულიყვნენ, რათა სააკაშვილის გადაყვანა მათთან შეთანხმებით მოხდეს.

ხერხეულიძის თქმით, ვიდრე ნიკა გვარამია და საელჩოს წარმომადგენელი სააკაშვილთან არ მივლენ და მათთან ერთად არ გადაწყდება გადაყვანის საკითხი, ის გლდანის სამკურნალო დაწესებულებიდან არ გადავა.