შიმშილობით ვის დაუმარცხებია მტერი და თან ასეთი უტიფარი მოძალადე?! შიმშილობის დაწყებას, პარლამენტიდან გამოსულიყვნენ და საკრებულოებში არ შესულიყვნენ, ყველაზე რადიკალური ნაბიჯი ეს იქნებოდა, მაგრამ სკამებიდან ვერ დაძრეს უმეტესობა,- ასე აფასებს „ტრიბუნას“ ლიდერი დავით ჭიჭინაძე „ნაციონალური მოძრაობის“ წევრებისა და მხარდამჭერების მიერ მასობრივი შიმშილობის დაწყებას.
როგორც ჭიჭინაძე აღნიშნავს, შიმშილობით მიხეილ სააკაშვილს ვერ გაათავისუფლებენ.
„ვისაც სურვილი ექნებოდა გამოყვებოდა და ვინც დარჩებოდა, მათ პირდაპირ დაერქმეოდა „ოცნება“! რა დროს ეტიკეტები და მიტევებაა ომში?! მით უმეტეს, როდესაც მოძალადეს ებრძვი! და თუ ვინმეს ჰგონია, რომ „ქართულ ოცნებაში“ ნამუსი შეაწუხებთ, ან იდარდებენ ადამიანების შიმშილზე, ძალიან ცდებიან და ვერც სააკაშვილს გაათავისუფლებენ ასე. ფინალში კი მივიღეთ ის, რომ რაც ახლა ხდება, ყველაზე უფრო სწორედ „ოცნებას“ აწყობს. ხალხში ნიჰილიზმია, ცვლილებების მოთხოვნა ფაქტობრივად გაქრა, „ოცნების“ ხელისუფლებას მომავალზე პასუხს აღარავინ სთხოვს, ადამიანები კი ქვეყნიდან გარბიან“,- აცხადებს დავით ჭიჭინაძე.