თუ გააგრძელებს ხელისუფლება ცივილიზებულ სამყაროსთან დაშორებას, ბოლოს არავინ დარჩება, რომ აღშფოთდეს - დავრჩებით მარტო, - ამის შესახებ „სტრატეგია აღმაშენებელის“ ერთ-ერთმა ლიდერმა, სერგო ჩიხლაძემ „პალიტრანიუსის“ გადაცემა „360 გრადუსში“ განაცხადა.

მისი თქმით, უკრაინის თავდაცვის სამინისტროს სადაზვერვო სამსახურის განცხადებასთან დაკავშირებით, მნიშვნელოვანია საქართველოს ხელისუფლებამ მჭიდროდ ითანამშრომლოს როგორც უკრაინასთან, ასევე დასავლელ პარტნიორებთან.

„აქამდე არ უნდა მიეყვანა ხელისუფლებას, ამდენი კითხვის ნიშანი არ უნდა გაჩენილიყო. ყველაფერი უნდა გააკეთოს ხელისუფლებამ, რომ როგორმე ამ ესკალაციიდან გამოვიდეს. ჩვენ თუ ამათი მხარდაჭერა დავკარგეთ, ვის იმედზე ვრჩებით საერთოდ?! ხვალ რომ მართლა რაღაც დაგვემუქროს, ეს საფრთხეები რუსეთის არსებობის პირობებში ყოველთვის არის, გააღიზიანებს თუ არა „ქართული ოცნება“ ამაზე არ არის დამოკიდებული, ვის იმედზე ვხვდებით? ბოლოს არავინ დარჩება, რომ აღშფოთდეს ამ სიტუაციაზე, დახმარებაზე აღარ არის, თუ ასე გააგრძელებს ხელისუფლება ცივილიზებულ სამყაროსთან დაშორებას. გამოსავალი არის მაქსიმალური თანამშრომლობა უკრაინასთან, დასავლელ პარტნიორებთან, მაქსიმალური გამჭირვალობა და ინფორმაციის ღიაობა. რაც უფრო მარტივია, უბრალოდ მეგობრული განცხადებები. ასეთი მტრის ძიებით ქვეყნის შიგნით და მის გარეთ, საბოლოო ჯამში „ქართული ოცნება“ დარჩება მარტო, მაგრამ ამ შემთხვევაში ჩვენ დავრჩებით მარტო ყველა გამოწვევის წინაშე“, - განაცხადა სერგო ჩიხლაძემ.

ცნობისათვის, უკრაინის თავდაცვის სამინისტროს დაზვერვის მთავარი სამმართველოს ინფორმაციით, რუსეთი სანქციების ქვეშ მოქცეული სამხედრო დანიშნულებისა და სხვა სახის პროდუქტის კონტრაბანდის არხებს ქმნის, რომელიც, მათ შორის, საქართველოს ტერიტორიაზე ქვეყნის ხელისუფლების თანხმობის საფუძველზე გაივლის.