არ დავეთანხმები მოსაზრებას, რომ კოვიდპაციენტებისთვის 9 ათასი საწოლი იყოს მობილიზებული და 200 პაციენტის პირობებში 9 ათასი საწოლის თანხები ვიხადოთ, - ამის შესახებ ჯანდაცვის მინისტრმა ზურაბ აზარაშვილმა მთავრობის სხდომის დასრულების შემდეგ განაცხადა, როდესაც უპასუხა კითხვას, რამდენად გონივრულია, რომ კოვიდკლინიკებს სტატუსი „ასე სწრაფად შეუწყდათ“.

როგორც მინისტრმა განმარტა, აღნიშნული სექტორის დაფინანსებაზე მთავრობამ 1 მილიარდ ლარზე მეტი დახარჯა.

„ჩვენ ამ სექტორის [კოვიდკლინიკების] დაფინანსებაზე 1 მილიარდ ლარზე მეტი გავწიეთ პანდემიის პერიოდში. ეს არის ის თანხა, რომელიც პანდემიის პერიოდშიც და მის შემდეგ პერიოდშიც, საკმარისია, რათა სწორი მიმართულება და ბიზნესმოდელი აირჩიოს როგორც კერძო სექტორმა, ასევე სახელმწიფო კლინიკებმა. დღეს ქვეყნის მასშტაბით 200-მდე პაციენტი მკურნალობს და არ დავეთანხმები მოსაზრებას, რომ 9 ათასი საწოლი იყოს მობილიზებული და 200 პაციენტის პირობებში 9 ათასი საწოლის თანხები ვიხადოთ. საშუალო 60%-იანი დატვირთულობის მიუხედავად, მთელი პანდემიის განმავლობაში 100%-ით უნაზღაურდებოდათ. აქედან გამომდინარე, ვერ დაგეთანხმებით, რომ რამე არასამართლიანი მიდგომით მოხდა“,- განაცხადა ზურაბ აზარაშვილმა.