„სტრატეგია აღმაშენებლის“ ლიდერის, გიორგი ვაშაძის განცხადებით, აშშ-ში საერთაშორისო პარტნიორები ექსპრეზიდენტ მიხეილ სააკაშვილის საკითხით ინტერესდებიან. როგორც მან „პალიტრანიუსის“ გადაცემაში „360 გრადუსი“ განაცხადა, „სტრატეგია აღმაშენებლის“ პოზიცია არის ის, რომ ჯანმრთელობის მდგომარეობიდან გამომდინარე, მიხეილ სააკაშვილი საზღვარგარეთ, მაგალითად, პოლონეთში გადაიყვანონ.
„რა თქმა უნდა, მიხეილ სააკაშვილის საკითხით ინტერესდებიან. თუ რამდენიმე თვის წინ თითქოს ნაკლები იყო ამ საკითხზე ყურადღება, დღეს ნამდვილად მომატებულია.
„სტრატეგია აღმაშენებლის" პოზიცია, რასაც შეხვედრებზე ვაყენებთ არის ის, რომ ჰუმანიტარული მიზნებისთვის უნდა მოხდეს მისი გადაყვანა ევროპული მიმართულებით. მათთვის წარმოუდგენელია, რომ ასეთი ტიპის ბრალდებებით ქვეყნის პრეზიდენტი საპატიმრო დაწესებულებაში იყოს. დემოკრატიისთვის ასეა და ეს უნდა გავიზიაროთ. ვის მოსწონს ის და ვის არა, ყველა ხვდება, რომ ქვეყნის შიგნით პოლიტიკურ პოლარიზების და დაძაბულობის განმუხტვის ერთ-ერთი გზა ეს არის, რომელიც ძალიან მნიშვნელოვანია. ამიტომ, თვითონ გვეკითხებიან რაშია გამოსავალი და ჩვენ ვეუბნებით იმას, რაც არის დაფიქსირებული. ჰუმანიტარული მიზნებისთვის, ჯანმრთელობის მდგომარეობიდან გამომდინარე, მისი გადაყვანა, მაგალითად, პოლონეთში. როგორც ვიცი, პოლონური მხარე მზად არის, რომ მიიღოს მიხეილ სააკაშვილი. ახლა ნელ-ნელა უფრო და უფრო გაიზრდება წნეხი საქართველოს ხელისუფლებაზე, რომ ამ მიმართულებით კონკრეტული ნაბიჯები გადაიდგას“,-განაცხადა ვაშაძემ.