ოპტიმისტური მოლოდინი გვაქვს და რწმენა, რომ მიიღება სამართლიანი გადაწყვეტილება ევროკავშირის მხრიდან და მეორე ვერსიაზე არ მინდა საუბარი - შემიძლია გითხრათ, რა იქნება ამ შემთხვევაში ოპოზიციის გეგმა: იქნება არეულობის მცდელობა, - ამის შესახებ „ქართული ოცნების“ თავმჯდომარემ, ირაკლი კობახიძემ „პალიტრანიუსის“ გადაცემა „პოლიტიკურ სივრცეში“ განაცხადა და ამით უპასუხა კითხვას, როგორ განვითარდება ქვეყანაში მოვლენები, თუკი საქართველომ ვერ მიიღო ევროკავშირის კანდიდატის სტატუსი.

როგორც კობახიძემ აღნიშნა, 20 ივნისს „ნაცმოძრაობის“ აქციაზე იქნება რეპეტიცია.

„ოპტიმისტური მოლოდინი გვაქვს და რწმენა, რომ საბოლოო ჯამში, მიიღება სამართლიანი გადაწყვეტილება ევროკავშირის მხრიდან და მეორე, პრაქტიკულ ვერსიაზე არ მინდა დღეს საუბარი.

შემიძლია გითხრათ, რა იქნება ამ შემთხვევაში ოპოზიციის გეგმა, რაზეც ისინი საჯაროდ უკვე საუბრობენ - ეს იქნება არეულობის მცდელობა, ბაკურიანის სცენარის განხორციელება, რაზეც საუბრობდნენ ბაკურიანში, რაც დაგეგმეს. 20 ივნისს „ნაცმოძრაობის“ აქცია იმართება, რეპეტიცია ექნებათ, შემდეგ ალბათ დაგეგმავენ, როდესაც გადაწყვეტილება გამოცხადდება და ეცდებიან არევას. ეს მარტივად გათამაშებული რაღაც არის, იქ იდგება „სირცხვილია“, რომელიც არის „ნაცმოძრაობის“ ახალგაზრდული ფრთა“, - განაცხადა ირაკლი კობახიძემ.