შალვა პაპუაშვილი მიხეილ ჩინჩალაძეზე - სასამართლო ხელისუფლება დამოუკიდებელი შტოა და სასამართლოს მართვაში ჩარევას არავინ აპირებს
სასამართლო ხელისუფლება დამოუკიდებელი შტოა და სასამართლოს მართვაში ჩარევას არავინ აპირებს, - ასე უპასუხა პარლამენტის თავმჯდომარემ შალვა პაპუაშვილმა თბილისის სააპელაციო სასამართლოს თავმჯდომარის თანამდებობაზე მიხეილ ჩინჩალაძის ხელმეორედ არჩევის თაობაზე დასმულ კითხვას. როგორც პაპუაშვილმა აღნიშნა, გადაწყვეტილება იუსტიციის უმაღლესმა საბჭომ მიიღო.
“ყველანაირი სასამართლო რეფორმის არსია, რომ ერთი შტო მეორეს საქმიანობაში არ უნდა ერეოდეს. იმ ორგანიზაციების პოზიციებს, რომლებიც ამბობენ, რომ მთავრობის შეცვლა დემოკრატიის გვერდის ავლით უნდა მოხდეს, დიდი წონა არა აქვს“, – განაცხადა შალვა პაპუაშვილმა.
ცნობისთვის, იუსტიციის უმაღლესმა საბჭომ თბილისის სააპელაციო სასამართლოს თავმჯდომარის თანამდებობაზე ხელმეორედ, 5 წლის ვადით მიხეილ ჩინჩალაძე აირჩია.
თბილისის სააპელაციო სასამართლოს თავმჯდომარის პოზიციაზე იუსტიციის საბჭოში წარდგენილი იყო მხოლოდ ერთი განაცხადი მიხეილ ჩინჩალაძის მიერ, რომელიც ამავე თანამდებობაზე 2017 წელს დაინიშნა, ხოლო 5 - წლიანი მუშაობის ვადა მას მიმდინარე წლის მაისის ბოლოს ამოეწურა.
v-if="article.gallery" v-html="article.gallery"
