გიგა ბოკერია - აწარმოებენ კამპანიას, რომ ამერიკა ირიბად ცდილობს საქართველოში სისხლის დაღვრას, ეს უტიფარი, პოლიტიკურად ავადმყოფები მშვიდობიანად უნდა ჩამოვაშოროთ ძალაუფლებას

ჩვენ ყველას გვახსოვს ახლაც კი ხევსურების ამერიკელების მიმართ გულისამაჩუყებელი წერილი, სადაც ეუბნებოდნენ, რომ ჩვენ ვართ თავისუფლების მოყვარე ხალხი და ყველაზე ძლიერი თავისუფალი ქვეყნის მხარდაჭერა გვჭირდება. მაშინ იმ ხალხს არც საელჩო ჰქონდა აქ და ეს ყველაფერი იყო იმ სულისკვეთებისა და ისტორიული არჩევანის გამოვლინება, რაც ქართველ საზოგადოებას ჰქონდა და აქვს, - ასე ეხმაურება „ევროპული საქართველოს“ თავმჯდომარე, გიგა ბოკერია დეპუტატ მიხეილ ყაველაშვილის განცხადებას.

გიგა ბოკერია თქმით, გვაქვს შესაძლებლობა, რომ გავაღწიოთ ამ ჭაობიდან, ვიყოთ თავისუფალი ქვეყანა, მაგრამ ამაში გვჭირდება თავისუფალი სამყაროს მხარდაჭერა და უნდა გვყავდეს მთავრობა, რომელიც პირველ რიგში ამერიკელებთან მუშაობითაა დაკავებული, რომ მეტი ინტეგრაციით უსაფრთხოების სფეროში, ნატო-ში ინტეგრაციით პირველ რიგში გავხდეთ დაცულები გარეშე მტრისგან და ვიყოთ თავისუფალი ქვეყანა, „მაგრამ ამის მაგივრად ხელისუფლება შესულია სამარცხვინო დაპირისპირებაში ჩვენს სტრატეგიულ პარტნიორთან“.

„კამათი ბევრ რამეზე შეიძლება, მაგრამ ესენი რუსეთის წინააღმდეგ კი არ აწარმოებენ კამპანიას, არამედ აწარმოებენ კამპანიას, რომ ამერიკა ირიბად ცდილობს საქართველოში სისხლის დაღვრას. ვიცით, რომ თქვენც იცით რომ გატყუებთო, მაგრამ მაინც მოგატყუებთო გვეუბნებიან. ეს უტიფარი, პოლიტიკურად ავადმყოფები მშვიდობიანად უნდა ჩამოვაშოროთ ძალაუფლებას“, - განაცხადა გიგა ბოკერიამ.