ცივილიზებულად ურთიერთობა უნდა შეგვეძლოს მათ შორის ტურისტთან, რომლის ყოფნაც, შესაძლოა, არ გსიამოვნებდეს - შეიძლება აქაური მოქალაქის ყოფნაც არ გსიამოვნებდეს, მაგრამ ეს იმას არ ნიშნავს, თავს უფლება მისცე და ვინმეს მოუწოდო ვინმეს „ჩაძაღლებისკენ“,- ამის შესახებ საპარლამენტო უმრავლესობის წევრმა მიხეილ სარჯველაძემ ჟურნალისტებს განუცხადა, რითაც გამოეხმაურა საქართველოში მყოფ რუსეთის მოქალაქეებთან დაკავშირებით თავდაცვის ყოფილი მინისტრის, ირაკლი ოქრუაშვილის „ფეისბუქ“ გვერდზე გამოქვეყნებულ პოსტს.

როგორც სარჯველაძე აღნიშნავს, ასეთი უპასუხისმგებლო განცხადებების ნაწილმა შესაძლოა აგრესია გამოიწვიოს უკრაინელი ადამიანების მიმართაც.

„არავინ ითხოვს, რომ ყველას გვქონდეს პოზიცია. ეს არ ნიშნავს იმას, რომ მხოლოდ ორი ვარიანტი არსებობს - ან გიყვარდეს, ან არ გიყვარდეს. ცივილიზებულად ურთიერთობა, ნორმალურად ქცევა უნდა შეგეძლოს, მათ შორის ტურისტთან, რომლის ყოფნაც, შესაძლოა, არ გსიამოვნებდეს. შეიძლება აქაური მოქალაქის ყოფნაც არ გსიამოვნებდეს, მაგრამ ეს იმას არ ნიშნავს, თავს უფლება მისცე და ვინმეს მოუწოდო ვინმეს „ჩაძაღლებისკენ“ (ბოდიშს ვიხდი ამ ტერმინის გამეორებისთვის). ყველას უნდა ჰქონდეს პასუხისმგებლობა ამ მიმართულებით. ძალიან დიდი ნაწილი ასეთი უპასუხისმგებლო განცხადებებისა, ახალისებს ისეთი აქტების ჩადენას, რომლებმაც შესაძლოა, აგრესია გამოიწვიოს იმ უკრაინელი ადამიანის მიმართ, რომელიც დღეს საქართველოში იმყოფება. ისეთი ქაოსური და არანორმალური ქცევების ინსპირირება შეიძლება მოახდინოს ამ ყველაფერმა, რომ შეიძლება არ განირჩეოდეს, ვინ-ვის წააგავს“,- განაცხადა მიხეილ სარჯველაძემ.

ცნობისთვის, გუშინ, თავდაცვის ყოფილი მინისტრის, ირაკლი ოქრუაშვილის „ფეისბუქ“ გვერდზე რუსეთის მოქალაქეებთან დაკავშირებით პოსტი გამოქვეყნდა, რომელიც მოგვიანებით, მის ფეისბუქ გვერდზე წაიშალა.