პრეზიდენტის ადმინისტრაციასა და საგარეო უწყებაში არ კეთდება კომენტარი ინფორმაციაზე, რომ სალომე ზურაბიშვილმა გაერო-ში ელჩად დავით ბაქრაძის დანიშვნას ხელი მოაწერა
საქართველოს პრეზიდენტის ადმინისტრაციასა და საგარეო საქმეთა სამინისტროში ჯერჯერობით არ კეთდება კომენტარი გავრცელებულ ინფორმაციასთან დაკავშირებით, რომ სალომე ზურაბიშვილმა გაერო-ში საქართველოს ელჩად დავით ბაქრაძის დანიშვნას ხელი მოაწერა.
შესაბამის ინფორმაციას „რუსთავი 2“ ავრცელებს და იუწყება, რომ ბაქრაძე, რომელიც აქამდე აშშ-ში საქართველოს ელჩის თანამდებობას იკავებდა, გაერო-ში დიპლომატიური მისიის ხელმძღვანელის პოსტზე კახა იმნაძეს შეცვლის.
ცნობისთვის, საქართველოს პრეზიდენტმა დავით ბარქაძის გაერო-ში ელჩად დანიშვნაზე წარდგინება 15 ივლისს მიიღო, თუმცა, ზურაბიშვილი მას ხელს არ აწერდა. როგორც პრეზიდენტმა ერთ-ერთ ინტერვიუში განაცხადა, ბაქრაძე „5 წელი იყო ელჩი და არაფერი გაუკეთებია“.
„არა მაღალი დონის ვიზიტი, არა კონტაქტები, არა იქით, არა აქეთ - წავიდეს სხვაგან“, - აღნიშნავდა პრეზიდენტი ინტერვიუში.
შეგახსენებთ იმასაც, რომ მმართველმა გუნდმა პრეზიდენტს ელჩების დანიშვნაზე უარის თქმის გამო საკონსტიტუციო სასამართლოში უჩივლა.
v-if="article.gallery" v-html="article.gallery"
