IRI-ის კვლევამ დაადასტურა, რომ ხელისუფლებას ისევე, როგორც ოპოზიციის დიდ ნაწილს არ აინტერესებს ჩვენი მოქალაქეების, მათ შორის მათივე მხარდამჭერების ყოველდღიური პრობლემები, - ამის შესახებ პარტია "საქართველოსთვის" წევრმა, დეპუტატმა, ბექა ლილუაშვილმა ბრიფინგზე განაცხადა.

მისი თქმით, კვლევაში ნათლად ჩანს, თუ როგორ არის ერთდროულად დაცემული იმ ორი პოლიტიკურ პარტიის რეიტინგი, "რომლებიც მუდმივად ერთმანეთს ეხმარებიან და ასაზრდოებენ".

"მათ აქვთ საკუთარი ტელევიზიები, ჰყავთ არაფორმალური მმართველი თუ ოლიგარქები, "ქართულ ოცნებას" ადმინისტრაციული რესურსებიც, თუმცა ფაქტია, რომ მიუხედავად ამ რესურსებისა, ვერც ერთი პარტია და ვერც მეორე პარტია ვეღარ ახერხებს მხოლოდ საკუთარი დღის წესრიგი შექმნას.

დღითიდღე ცხადი ხდება, მათ შორის ამ კვლევის შედეგებით, რომ ისინი კარგავენ უნარს საზოგადოებას თავზე მოახვიონ თავიანთი ლეგენდები და საზოგადოებაში მათი მხარდაჭერა იკლებს. ეს ხდება მაშინ, როდესაც ორივე პარტია აქტიურ პოლიტიკაშია.

კვლევაში ნათლად არის ასახული საქართველოში განვითარებული ბოლო პერიოდის მდგომარეობა:

ქართველი ხალხის მკაფიო დასავლური კურსის შეუცვლელი არჩევანი - რომელსაც "ქართული ოცნება" ცდილობს 12 რეკომენდაციის შინაარსობრივად შესრულების ნაცვლად 12 ალიბის შექმნა დაუპირისპიროს, ხოლო ოპოზიციის ნაწილი ცდილობს ქვეყნის მარცხი საკუთარი ვიწრო პარტიულ ინტერესად აქციოს," - განაცხადა ბექა ლილუაშვილმა.

მისი თქმით, ამ მოცემულობაში არ არის გასაკვირი, რატომ არის პარტია "საქართველოსთვის" ყველასთვის მთავარი სამიზნე და დარტყმის ობიექტი.

"ჩვენ ვართ ერთადერთი პარტია, რომელიც ამ ეტაპზე თავის გეგმას ასრულებს და მიუყვება. ეს იმ პირობებში, როცა სრულად შეზღუდული გვაქვს მედია რესურსები, ფაქტობრივად ყველა პარტიულ ტელევიზიაში.

მეტიც, "იმედზე" გვაშუქებენ მხოლოდ მაშინ, როცა ხელისუფლება დაუკვეთავს ბინძურ პროპაგანდას და ტყუილებს ჩვენს პარტიასა თუ ლიდერებზე.

ამ ყველაფრის გათვალისწინებით კიდევ ერთხელ დასტურდება, რომ ჩვენ ასე თანმიმდევრულად და ნაბიჯ - ნაბიჯ დავასრულებთ ორპოლუსიანობას, "ქოცების" და "ნაცების" გაუთავებელ ურთიერთ ქიშპს და ამით ქვეყნის დაზიანებას", - განაცხადა ბექა ლილუაშვილმა.