პარტია „ანა დოლიძე - ხალხისთვის“ საკრებულოს წევრმა ნინო წულაძემ, თბილისის საკრებულოში პიროტექნიკის გამოყენებასთან დაკავშირებით ინიციატივა დაარეგისტრირა.
როგორც წულაძემ ბრიფინგზე აღნიშნა, პიროტექნიკის არასწორი გამოყენება ხშირად დამწვრობითა და სხეულის მძიმე დაზიანებებით სრულდება, რისი მაგალითიც გასული წლების სტატისტიკამ არაერთხელ გვაჩვენა.
"მნიშვნელოვანია, თბილისის მუნიციპალიტეტში უზრუნველვყოთ საჯარო სივრცეებისა და კონკრეტული საზოგადოებრივი თავშეყრის ადგილების განსაზღვრა, სადაც აიკრძალება პიროტექნიკის გამოყენება დღის ნებისმიერ მონაკვეთში, მათ შორის სადღესასწაულო დღეებშიც. 2022 წლის მონაცემებით, საქართველოში ახალი წლის ღამეს პიროტექნიკის გამოყენების შედეგად 27, თბილისში კი 8 ადამიანი დაშავდა, მათ შორის ერთი არასრულწლოვანი. საკითხის აქტუალობიდან და საზოგადოების მაღალი ინტერესიდან გამომდინარე, პარტია ,,ანა დოლიძე-ხალხისთვის" მიმართავს ქალაქ თბილისის საკრებულოს რათა გონივრულ ვადაში უზრუნველყონ მათი ინიციატივის განხორციელება ", - განაცხადა ნინო წულაძემ.
