პირველი კურსის იურისტისთვისაც კი ცხადია, რომ დღეს პრეზიდენტის მიერ მიხეილ სააკაშვილის შეწყალება, ციხიდან მისი გათავისუფლების საფუძველი ვერ გახდება, - ამის შესახებ ჟურნალისტებს პარლამენტის ოპოზიციონერმა ვიცე-სპიკერმა ლევან იოსელიანმა განუცხადა.

იოსელიანის თქმით, მას არ დარჩა იმგვარი შთაბეჭდილება, რომ სალომე ზურაბიშვილი საკუთარი განცხადების ერთგული არ არის.

„ორივე მხარე სალომე ზურაბიშვილს აგრესიულად და უსამართლოდ სთხოვს იმის გაკეთებას, რის გაკეთებასაც არ აპირებდა. პრეზიდენტის მიერ სააკაშვილის შეწყალება არ ნიშნავს, რომ ის საპატიმროს მაშინვე დატოვებს, რადგან მიმდინარე საქმეები არსებობს და ამას თავისი იურიდიული პროცედურები აქვს. ამის მიუხედავად, ასეთი დაჟინებით ხდება აქციების მოწყობა და მოთხოვნის დაყენება შეწყალებაზე, რაც, რა თქმა უნდა, არის ზეწოლა, რომელიც კონკრეტულ შედეგზეა გათვლილი“, - განაცხადა ლევან იოსელიანმა.