რომან გოცირიძე - სააკაშვილის გარდაცვალების შემთხვევაში, ივანიშვილმა შეიძლება გაასწროს, ვერტმფრენი ჰყავს, ჩაჯდება და გადაფრინდება ცხინვალში, მაგრამ ის ადამიანები, რომლებიც ამ განცხადებებს ახმაურებენ, მართლა ვერ გაასწრებენ

ნუ ეშმაკობენ, ახალ-ახალ არგუმენტებს ნუ იგონებენ, რომელიც დაკავშირებულია მიხეილ სააკაშვილის სიცოცხლესთან. მრავალწლიანი, 20-30 წლიანი გამოუვალი კრიზისი იქნება საქართველოში, ვერ გაიხარებს ვერც ივანიშვილი და ვერც მისი გარემოცვა, - ასე გამოეხმაურა „ერთიანი ნაციონალური მოძრაობის“ დეპუტატი, რომან გოცირიძე „ხალხის ძალის“ გუშინდელ განცხადებას, რომ სააკაშვილის „პატრონები“, რომლებსაც მისი ლიკვიდაციის გეგმა შეიძლება ჰქონდეთ, ევროპარლამენტარები, აშშ-ს ყოფილი თანამდებობის პირები და „გარკვეული ძალები“ არიან.

გოცირიძემ „პალიტრანიუსის“ გადაცემა „ნიუსრუმში“ „ხალხის ძალის“ აღნიშნულ განცხადებას აბსურდული და საშიში უწოდა. მისივე თქმით, „თუ უშვებენ იოტის ოდენად იმ ფიქრს, რომ მიხეილ სააკაშვილის სიკვდილის რაიმე ფორმით ან გუშინდელი განცხადებების მსგავსად გამართლება შეუძლიათ, ეს არის წარმოუდგენელი შეცდომა“.

„რა ევროპა და რა დასავლეთისკენ სვლა, საქართველოში იქნება სიძულვილისა და ანტაგონიზმის მრავალ ათწლიანი პერიოდი. ამიტომ დაფიქრდნენ პრაგმატულადაც და დაფიქრდნენ ქვეყნის ბედზეც. ეს არის პასუხი იმაზე, რა განცხადებაც მათ გუშინ გააკეთეს“, - აღნიშნა გოცირიძემ.

ამასთან, როგორც გოცირიძემ განაცხადა, სააკაშვილის გარდაცვალების შემთხვევაში, ივანიშვილი ვერ გაასწრებს საქართველოდან.

„ივანიშვილი ვერ გაასწრებს საქართველოდან, შეიძლება ივანიშვილმა გაასწროს მას ვერტმფრენი ჰყავს, ჩაჯდება და გადაფრინდება ცხინვალში, მაგრამ, აი, ეს ჩლუნგები, რომლებიც ამას ახმაურებენ, მართლა ვერ გაასწრებენ. ეს იქნება კატასტროფული“, - განაცხადა ოპოზიციონერმა პოლიტიკოსმა.

გარდა ამისა, გოცირიძემ განაცხადა, რომ ივანიშვილი უკრაინაში მიმდინარე ომში რუსეთის მხარესაა. ენმ-ს დეპუტატის თქმით, ივანიშვილმა გადაწყვიტა დასავლეთს რუსეთის ზურგით შეუტიოს.

„ნელ-ნელა მოუჭირა [ივანიშვილს] ყელში ყულფმა, აგერ, უკრაინაში დასანქცირებულია მისი ოჯახის წევრები, ოლიგარქად მოხსენიება, ოლიგარქის კანონის მიღება პარლამენტში, რომელიც ევროკავშირში გაწევრიანების ერთ-ერთი მოთხოვნაა. მისი დასანქცირების ორი რეზოლუცია, და მან გადაწყვიტა, რომ მოდი მე ახლა შევუტევ რუსეთის ზურგით დასავლეთს და მე ავიყვან საქართველოს მძევლად. ჯერ უკრაინას ზურგი შეაქცია, არ არიან სოლიდარულები და მე წავალ რუსეთისაკენ და რეალურად ასეც მოხდა ამ პროცესში, ის რუსეთის მხარესაა ამ ომში“, - აღნიშნა გოცირიძემ.

ამას გარდა, გოცირიძე ტელეკომპანია „პალიტრანიუსის“ ეთერში, გუშინ, „ქართული ოცნების“ დეპუტატს ირაკლი ზარქუასა და „სტრატეგია აღმაშენებლის“ ლიდერს გიორგი ვაშაძეს შორის მომხდარ ინციდენტის გამოეხმაურა და აღნიშნა, რომ „ძალიან პრიმიტიული და არამორალური ნორმებია რაც ჩვენს პოლიტიკაში მკვიდრდება“.

„სიმწვავე, ხმამაღალი საუბარი, პოპულიზმი ყოველთვის იქნება პოლიტიკისთვის დამახასიათებელი, მაგრამ ზღვარი უნდა იცოდე. ამ ზღვარს როდესაც გადასცდები, შენ პატივს არ სცემ ხალხს, ვინაიდან ეკრანს უყურებს მილიონობით ადამიანი“, - დასძინა გოცირიძემ.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
„დაგროვებითი პენსიის შესახებ“ კანონში ცვლილებები შედის - რა სიახლეებს უნდა ელოდონ საპენსიო სქემის მონაწილეები
მწვანე განვითარების მხარდაჭერა თუ ხელის შეშლა - „ჭარბი საწარმოო სიმძლავრის“ თეორიის სიყალბე
როგორ ვებრძოლოთ მოგზაურთა დიარეას
„სიმეტრია პარკი“ მთაწმინდის რაიონში კომერციული ფართის მშენებლობის დასრულებას აანონსებს
ISET-ის ფინანსების სამაგისტრო პროგრამამ CFA ინსტიტუტთან აფილირება მიიღო
„ბიზნეს ოსკარად“ წოდებული „ოქროს ბრენდის“ დაჯილდოებაზე PSP კვლავ N1 ფარმაცევტულ ბრენდად აღიარეს
ქართული პრესის მიმოხილვა 20.06.2024