„ნაციონალური მოძრაობის“ წევრის, გიორგი ბოტკოველის განცხადებით, ექსპრეზიდენტ მიხეილ სააკაშვილის საქმეზე პროცესის გაწელვით, „ბიძინა ივანიშვილი ცდილობს, უფრო მეტად გაწელოს თავისი ბედის ძაფი“.

როგორც მან ჟურნალისტებთან აღნიშნა, ხელისუფლებამ მიხეილ სააკაშვილი ფაქტობრივად, სასიკვდილოდ გაიმეტა.

„ალბათ, ბიძინა ივანიშვილი ამ პროცესის გაწელვით ცდილობს, უფრო მეტად გაწელოს თავისი ბედის ძაფი. ვერავინ დამაჯერებს, რომ მან არ იცის, მიხეილ სააკაშვილის ამ მდგომარეობაში ჩაგდებით, თავად რა მდგომარეობაში ვარდება... პრეზიდენტი მიხეილ სააკაშვილი ციხეში ჰყავს გამოკეტილი და ფაქტობრივად, სასიკვდილოდ გაიმეტა. ჩვენ ვხედავთ მის მიერ შექმნილი პარტიების თუ მოძრაობების განცხადებებს, სადაც პირდაპირ საუბრობენ იმაზე, რომ მზად არიან ადამიანის სიცოცხლე გაწირონ“, - განაცხადა ბოტკოველმა.

მისი თქმით, ხელისუფლებას შურისძიების მოტივი ამოძრავებს მიხეილ სააკაშვილის მიმართ და სურს ადამიანი სიცოცხლეს გამოასალმოს.

„ეს არის ჩვეულებრივი პოლიტიკური პროცესი, მაგრამ დარწმუნებული ვარ, ეს პოლიტიკური პროცესი მივა იმ წერტილამდე, რომ მიხეილ სააკაშვილის სიცოცხლე უნდა გადარჩეს. სხვა შანსი არ არსებობს. თუ ადამიანები ფიქრობენ, რომ ამ ქვეყანას სჭირდება განვითარება, მაშინ არავის უნდა ჰქონდეს იმის უფლება, ქვეყნის მესამე პრეზიდენტის სიცოცხლე აბუჩად აიგდოს“, - განაცხადა ბოტკოველმა.

ცნობისთვის, მიხეილ სააკაშვილისთვის სასჯელის გადავადების, ან სასჯელისგან გათავისუფლების საკითხზე ამ წუთებში მორიგი სასამართლო პროცესი მიმდინარეობს.