ეს არის თავიდან ბოლომდე ბიძინა ივანიშვილის დაკვეთის შესრულება, როგორც მოსალოდნელი იყო, - ასე შეაფასა „ნაციონალური მოძრაობის“ წევრმა გიორგი მუმლაძემ გადაწყვეტილება, რომელიც მოსამართლე გიორგი არევაძემ მიხეილ სააკაშვილისთვის სასჯელის გადავადების ან გაუქმების შესახებ დაცვის მხარის მიერ დაყენებულ შუამდგომლობაზე მიიღო.

მისი თქმით, სააკაშვილი უნდა გადარჩეს და ამისთვის უნდა გაკეთდეს ყველაფერი, ყველა ცივილიზებული მეთოდის მათ შორის აქციების გამოყენებით.

„ეს არის თავიდან ბოლომდე ბიძინა ივანიშვილის დაკვეთის შესრულება, როგორც მოსალოდნელი იყო. სამართალთან არავითარი კავშირი არ აქვს ამას. ეს არის ის, რაც, საბოლოო ჯამში, იყო მთელი ამ სპექტაკლის ნაწილი. ბიძინა ივანიშვილმა თითქოს ამ გზით პასუხისმგებლობა აირიდა თავიდან, მაგრამ, არა, ის არის პასუხისმგებელი იმაზე, რომ მიხეილ სააკაშვილს გამოუტანეს, პრაქტიკულად, სასიკვდილო განაჩენი. მიშა უნდა გადარჩეს, ამისთვის ჩვენ უნდა გავაკეთოთ ყველაფერი, ყველა ცივილიზებული მეთოდის გამოყენებით, რაც ცივილიზებული მსოფლიოსთვის არის მისაღები, პროტესტი იქნება თუ სხვა ტიპის მოქმედებები“,- განაცხადა გიორგი მუმლაძემ.