"ქართული ოცნების" ანტიდემოკრატიულმა ნაბიჯებმა გამოიწვია დასავლური, დემოკრატიული სამყაროს მძაფრი უარყოფითი რეაქცია , - ამის შესახებ „ლელოს“ გენერალურმა მდივანმა ბადრი ჯაფარიძემ განაცხადა, რითაც გამოეხმაურა მიხეილ სააკაშვილის ჯანმრთელობის მდგომარეობასთან დაკავშირებით ევროპარლამენტის მიერ მიღებულ რეზოლუციას.

ბადრი ჯაფარიძის განცხადებით, ევროპული ოჯახისკენ მიმავალ გზას „სრულად არის აცდენილი“ ივანიშვილი და მის მიმართ „დაქვემდებარებული ხელისუფლება“.

„ევროპარლამენტი მოითხოვს ბიძინა ივანიშვილის დასანქცირებას. ეს ნიშნავს იმას, რომ "ქართული ოცნების" ანტიდემოკრატიულმა ნაბიჯებმა გამოიწვია დასავლური/ დემოკრატიული სამყაროს მძაფრი უარყოფითი რეაქცია, რაც განსაკუთრებით დამაზიანებელია ჩვენი ქვეყნისთვის ამ ისტორიულ მომენტში, როდესაც რამდენიმე თვეში უნდა გადაწყდეს საქართველოსთვის ევროკავშირის წევრობის კანდიდატის სტატუსის მინიჭების საკითხი.

ჩვენი ხალხის და ჩვენი სახელმწიფოს მომავალი დაკავშირებულია ევროპული ოჯახისკენ მიმავალ გზასთან, რასაც სრულად არის აცდენილი ივანიშვილი და მის მიმართ დაქვემდებარებული ხელისუფლება”, - აცხადებს ჯაფარიძე.

ინფორმაციისთვის, ევროპარლამენტმა საქართველოს ყოფილი პრეზიდენტის, მიხეილ სააკაშვილის ჯანმრთელობის მდგომარეობის შესახებ რეზოლუცია მიიღო. რეზოლუცია ხაზს უსვამს იმ "ფუნდამენტურ როლს, რომელიც ოლიგარქმა ბიძინა ივანიშვილმა სააკაშვილის დაკავებაში, პირადი ვენდეტის ფარგლებში, ითამაშა". ამიტომ, პარლამენტი იმეორებს თავის მოწოდებას [ევროპული] საბჭოსა და დემოკრატიული პარტნიორების მიმართ, განიხილონ ივანიშვილისთვის სანქციების დაწესება „საქართველოში პოლიტიკური პროცესის გაუარესებაში“ მისი როლისთვის.

რეზოლუციაში, ევროპარლამენტი გამოხატავს სერიოზულ შეშფოთებას საქართველოს ყოფილი პრეზიდენტის, მიხეილ სააკაშვილის ჯანმრთელობის გაუარესების გამო.

ევროპარლამენტარები მოუწოდებენ საქართველოს ხელისუფლებას, გაათავისუფლოს მიხეილ სააკაშვილი და მისცეს მას საზღვარგარეთ სათანადო სამედიცინო დახმარების მიღების საშუალება. ასევე, ისინი პრეზიდენტს, სალომე ზურაბიშვილს მოუწოდებენ, გამოიყენოს კონსტიტუციური უფლება და შეიწყალოს მიხეილ სააკაშვილი.

ევროპარალამენტარები მიიჩნევენ, რომ ყოფილი პრეზიდენტის მდგომარეობის გაუმჯობესებასთან დაკავშირებით მუდმივი წარუმატებლობა საქართველოს მიერ ევროკავშირის წევრობის კანდიდატურის მიღების პერსპექტივის შეფერხების რისკს ქმნის.

რეზოლუციას მხარი 577-მა პარლამენტარმა დაუჭირა, 33 წინააღმდეგი წავიდა, 26-მა კი - თავი შეიკავა.