მიხეილ სარჯველაძე - მადლობას ვერ გადავუხდი ადამიანს, ვინც გაბედა და „მოლოტოვის კოქტეილი“ ისროლა

მადლობას ვერ გადავუხდი ადამიანს, ვინც გაბედა და ისროლა „მოლოტოვის კოქტეილი“. ამ პროცესს ვინმე ან უნდა გაემიჯნოს, ან მადლობები უნდა გადაუხადოს. მე კიდევ ავდგები და ზეგ ვისი დაბადების დღეც არის, გიორგი მაზნიაშვილის, მადლობას იმ კაცს გადავუხდი და არა ყალბ გმირებს, რომლის შექმნის მცდელობასაც თვალს ვადევნებთ, - ამის შესახებ „ქართული ოცნების“ დეპუტატმა, მიხეილ სარჯველაძემ პლენარულ სხდომაზე განაცხადა, რითაც გამოეხმაურა პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ბრალდებულის, ლაზარე გრიგორიადისის საკითხს.

მისი თქმით, არსებობს ერთ-ერთი მსხვილი პრობლემა, მათ შორის უფლებადაცვითი მიმართულებით, როდესაც ადამიანები ცდილობენ, რომ უფლებების დაცვის საქმე პროპაგანდის ნაწილად აქციონ და ეს მხოლოდ პიარის ნაწილი იყოს.

„აქ, საუბარი იმაზე კი არ არის ვინმეს უდანაშაულობა დაცული უნდა იყოს თუ არა და უფლებების დაცვას საკამათოდ არავინ თვლის, მაგრამ როდესაც ოპოზიცია განცხადებებით გამოდის და ცდილობს, რომ გმირად შერაცხოს ადამიანი, რომელიც საზოგადოებას გაეცნო, როგორც „მოლოტოვის კოქტეილის“ მსროლელი, ეს არის პრობლემა. რა თქმა უნდა, ასეთ დროს, აბსოლუტურად სწორია საზოგადოებას ვუთხრათ, ვინ არის ნამდვილი გმირი და აქ, მე მადლობას ვერ გადავუხდი ადამიანს ვინც გაბედა და ისროლა „მოლოტოვის კოქტეილი“. ამ პროცესს ან უნდა გაემიჯნოს, ან ვინმემ მადლობები უნდა გადაუხადოს. მე კიდევ ავდგები და ზეგ ვისი დაბადების დღეც არის, გიორგი მაზნიაშვილის, მადლობას იმ კაცს გადავუხდი და არა, ყალბ გმირებს, რომლის შექმნის მცდელობასაც თვალს ვადევნებთ. ამით დამთავრდეს, აღარ არის საჭირო ამის გამეორება“, - განაცხადა სარჯველაძემ.