თსუ-ს რექტორის, ჯაბა სამუშიას ინიციატივით „თბილისის სახელმწიფო უნივერსიტეტის ენციკლოპედია“ იქმნება.

ენციკლოპედია 4 ტომად გამოიცემა და მასზე თსუ-ის მეცნიერები, მკვლევრები, მუზეუმისა და ბიბლიოთეკის თანამშრომლები იმუშავებენ.

თსუ-ის ინფორმაციით, აღნიშნული ინიციატივა თსუ-ს რექტორმა საუნივერსიტეტო საზოგადოების წევრებს გააცნო და განაცხადა, რომ შეიქმნება სარედაქციო კომისია, რომელიც ოთხტომეულის გამოცემაზე იმუშავებს.

„თბილისის სახელმწიფო უნივერსიტეტისა და მე-20 საუკუნის საქართველოს ისტორია მჭიდროდაა ერთმანეთთან დაკავშირებული. ამიტომ ენციკლოპედია მნიშვნელოვანი მასალა იქნება მკვლევრებისთვის და საინტერესო საკითხავი ნებისმიერი მკითხველისთვის. ოთხტომეულში გაერთიანდება ყველა ფაქტი, მოვლენა, სახე, სახელი, რომელიც უკავშირდება თბილისის სახელმწიფო უნივერსიტეტს და რომელთაც დიდწილად განსაზღვრეს ჩვენი ქვეყნის ისტორია. მასში თავს მოიყრის საზოგადოებისთვის ნაკლებად ცნობილი ან საერთოდ უცნობი და შეუსწავლელი მასალა, რომელიც ინახება თსუ მუზეუმებში, ბიბლიოთეკებში, კვლევით ინსტიტუტებსა და ფაკულტეტებზე“, - განაცხადა ჯაბა სამუშიამ.

მათივე ცნობით, ენციკლოპედიასთან ერთად იგეგმება თსუ-ის ისტორიის ცალკე გამოცემა, რომელიც თბილისის სახელმწიფო უნივერსიტეტის სტუდენტებს საჩუქრად გადაეცემათ.

თსუ რექტორის ჯაბა სამუშიას განცხადებით, ას წელზე მეტია სწორედ თბილისის სახელმწიფო უნივერსიტეტი განსაზღვრავს ქვეყანაში მეცნიერებისა და განათლების განვითარებას. აღნიშნული ინიციატივა ერთის მხრივ, გააცნობს თსუ სტუდენტებს უნივერსიტეტის შექმნისა და არსებობის იდეას, ამავე დროს, იმ ადამიანების ღვაწლს, რომლითაც დღემდე ქვეყანა ამაყობს.