ნამდვილად უფრო გამიხარდებოდა სხვა კატეგორიის ტურისტებისა და მოგზაურების ყოლა საქართველოში, - ამის შესახებ ადამიანის უფლებათა კომიტეტის თავმჯდომარე მიხეილ სარჯველაძემ ჟურნალისტებთან განაცხადა, რითაც გამოეხმაურა ინფორმაციას ჩეჩნეთიდან შემოსული პირების შესახებ.

სარჯველაძე აცხადებს, რომ ასეთ დროს აუცილებელია ყურადღება, თუმცა დასძენს, რომ მას აქვს საფუძველი შესაბამისი სტრუქტურების მიერ მიღებულ გადაწყვეტილებებს ენდოს.

„სხვათა შორის, მეც დიდი ყურადღებით დავაკვირდებოდი ასეთი პირების გადაადგილებას, თუმცა პერსონალიებზე საუბარი არ შემიძლია, კონკრეტული პირი არის თუ არა რომელიმე დაჯგუფების წევრი, მაგრამ ყურადღება ასეთ დროს განსაკუთრებულად მნიშვნელოვანი და აუცილებელია. საქმე რაშია - როცა კონკრეტული ინფორმაცია არ არსებობს, ავტომატურად ეჭვმიტანილად გამოყვანა რამეში, არშემოშვებაზე, შეზღუდვების დაწესების თაობაზე საუბარი ასე არ ხდება, უსაფრთხოების რისკები ასე არ იმართება. გვაქვს საფუძველი ვენდოთ, რა გადაწყვეტილებებიც მიიღება. კონკრეტულ რისკს თუ ვერ ვხედავთ, რაიმე ექსტრაორდინარული გადაწყვეტილების მიღების საჭიროება არაა. თუმცა, ყველაფერთან ერთად უნდა ვთქვათ, რომ ნამდვილად უფრო გამიხარდებოდა, სხვა კატეგორიის ტურისტებისა და მოგზაურების ყოლა საქართველოში, არ არის სასიამოვნო საკუთრივ ეს ფაქტი, თუნდაც იმიტომ, რომ განსაკუთრებულ ყურადღებას მოითხოვს უსაფრთხოების რისკებიდან გამომდინარე,"- განაცხადა სარჯველაძემ.