გერმანია ეძებს გზას თუ როგორ შეიძლება მოიქცეს იმ ვითარებაში, როცა სურს ქართველ ხალხს ევროპული მომავლის უზრუნველყოფაში დაეხმაროს, მაგრამ ევროკავშირის მოთხოვნები დღემდე შეუსრულებელია - ამას ადასტურებს ინტერესი, რასაც გერმანიის მხრიდან შეხვედრების სახით ვხედავთ, - ამის შესახებ ჟურნალისტებს ოპოზიციონერმა დეპუტატმა სალომე სამადაშვილმა განუცხადა.

სამადაშვილი დარწმუნებულია, რომ გერმანიის კანცლერის ირაკლი ღარიბაშვილთან დახურულ კარს მიღმა შეხვედრა საკმაოდ მძიმე იქნება და საუბარი ყველა იმ პრობლემებს შეეხება, რითაც საქართველოს ხელისუფლება კანდიდატის სტატუსის მინიჭებას უქმნის.

სამადაშვილმა ხაზგასმით აღნიშნა, რომ კანდიდატის სტატუსის მინიჭების საქმეში გერმანიის პოზიცია გადამწყვეტია.

„ლელოს“ გერმანიის დედაქალაქში ძალიან წარმატებული ვიზიტი ჰქონდა. შეხვედრები გვქონდა ყველასთან, ვინც საქართველოს თემაზე მუშაობს როგორც კანცლერის ოფისში, ასევე ბუნდესტაგში. ძალიან ნათელი სურათი დავინახეთ - ერთის მხრივ გერმანია ჩვენს ქვეყანას და ქართველი ხალხის ევროპულ მომავალს პოლიტიკურად მხარს უჭერს, მაგრამ მეორეს მხრივ, არსებობს ძალიან დიდი შეშფოთება, რომ საქართველოს ხელისუფლებამ ევროკავშირის მოთხოვნების შეუსრულებლობით შეუძლებელი გახადა მიმდინარე წელს კანდიდატის სტატუსის მხარდაჭერა", - განაცხადა სალომე სამადაშვილმა.