ნანა ტოხვაძე - მორალი და ღირსება არც ასაკთან ერთად მოდის, არც არსად მიდის

მორალი და ღირსება არც ასაკთან ერთად მოდის, არც არსად მიდის, - ასე გამოეხმაურა „სტრატეგია აღმაშენებლის“ პოლიტიკური საბჭოს წევრი, ნანა ტოხვაძე ბექა ყორშიასა და როინ მეტრეველის სატელეფონო ინტერვიუს.

მისი თქმით, სიუჟეტმა კიდევ ერთხელ ცხადყო, რომ ნომენკლატურა განათლებისა და მეცნიერების წინააღმდეგ ძალებს კვლავ იკრებს.

„მეცნიერებათა აკადემიის „საქმიანობასთან“ დაკავშირებულმა სიუჟეტმა დაგვარწმუნა, რომ მორალი და ღირსება არც ასაკთან ერთად მოდის, არც არსად მიდის. სამწუხაროდ, ნომენკლატურა კვლავ ძალებს იკრებს განათლებისა და მეცნიერების საზიანოდ. ახლა მნიშვნელოვანია, რა გზას ვადგებით როგორც საზოგადოება?! უშედეგოდ ველით როინ მეტრეველის მორალური კომპასის გასწორებას და "დანიშნული თანამდებობიდან" გადადგომას? თუ ვითხოვთ, რომ მახინჯი სისტემა შეიზღუდოს თუ მორალით არა, შესაბამისი კანონმდებლობით მაინც?

მეცნიერთა აკადემიის ამ ფორმითა და შინაარსით არსებობის აზრს ვერც აქამდე ვხედავდით, მაგრამ რომელიმე მომხდარი ფაქტი ხომ შეიძლება გახდეს მიზეზი რეალური რეფორმირების?! იქნებ მსჯელობისა და ღია დისკუსიის დაწყება დაგვიანებულიცაა, მაგრამ სირცხვილის მოწმენდის მცდელობად მაინც ჩაითვლება მომავალი თაობის თვალში", - აღნიშნა ტოხვაძემ, რომლის კომენტარსაც "სტრატეგია აღმაშენებელი" ავრცელებს.