„ქართული ოცნება" თუ შეეცდება დეოლიგარქიზაციის კანონის მიღებას, ეს იქნება კანდიდატის სტატუსის წინააღმდეგ საბოტაჟი - ეს შეფასდება ევროკავშირის მხრიდან არა როგორც დეოლიგარქიზაციის მოთხოვნის შესრულება, არამედ როგორც თავდასხმა ქართულ დემოკრატიაზე, - ამის შესახებ "ლელოს" დეპუტატმა სალომე სამადაშვილმა ვენეციის კომისიის დასკვნის კომენტირებისას განაცხადა.
მისი თქმით, ამ კანონის მიღება შესაძლოა, აღმოჩნდეს არანაკლებ დამაზიანებელი, ვიდრე ეს იყო ე.წ აგენტების შესახებ კანონი, რომლის მიღებასაც უმრავლესობა გეგმავდა.
„ამ კანონის მიღება ვერ შეასრულებს ევროკავშირის მოთხოვნას, მაგრამ ძალიან დიდ დარტყმას მიაყენებს დემოკრატიულ პლურალიზმს და ქვეყანაში დემოკრატიის განვითარებას. ვენეციის კომისიის დასკვნა პირდაპირ იმეორებს იმ შეფასებებს, რაც ამ თემაზე ჩვენ გავაკეთეთ და პირდაპირ მოუწოდებს ხელისუფლებას, რომ არ იქნას მიღებული. ამიტომ მინდა ხაზგასმით ვთქვა, ამ კანონპროექტის მიღება უმრავლესობის მიერ იქნება არა ევროკავშირის მოთხოვნების შესრულება, არამედ კანდიდატის სტატუსის წინააღმდეგ მიმართული მორიგი საბოტაჟი, რადგან ვენეციის კომისიის მსგავსი დასკვნის პირობებში მისი მიღება იქნება დამაზიანებელი ამ ქვეყნისთვის, შესაძლოა, არანაკლებ დამაზიანებელი ვიდრე რუსული კანონი აგენტების შესახებ რომლის მიღებასაც ცდილობდა "ქართული ოცნება" ამ პარლამენტში.
ჩვენ გვითხრეს ევროპარლამენტის წევრებმა, რომ დეოლიგარქიზაცია ნიშნავს დებიძინიზაციას, დებიძინიზაცია ნიშნავს დემოკრატიული არჩევნების გზით ხელისუფლების ცვლილებას და ოლიგარქის მიერ მიტაცებული სახელმწიფო ინსტიტუტების გათავისუფლებას. ეს (სახელმწიფო ინსტიტუტების გათავისუფლება) თქვა ვენეციის კომისიამ თავის დასკვნაშიც,"- განაცხადა სამადაშვილმა.
სამადაშვილმა ასევე ისაუბრა ეროვნული ბანკის შესახებ კანონპროექტზე და აღნიშნა, რომ "ქართული ოცნების" მიერ ვეტოს დაძლევაც სწორედ სტატუსის მიღების წინააღმდეგ გადადგმული ნაბიჯია, რადგან ევროკავშირის მოთხოვნებს შორის ერთ- ერთი მთავარი მოთხოვნა ინსტიტუციების დამოუკიდებლობის გაძლიერებაა.
„ყველა ნაბიჯი, რომელიც მიმართულია ეროვნული ბანკის საბოლოო გაუქმებისკენ პირდაპირ ეწინააღმდეგება ევროკავშირის მოთხოვნებს. ეს მნიშვნელოვანია ვენეციის კომისიის დასკვნის ფონზეც, რომელიც ამბობს, რომ უნდა გააძლიერონ დამოუკიდებელი ინსტიტუტები, მათ შორის იგულისხმება ეროვნული ბანკიც. ამიტომ ვეტოს დაძლევის მიმართულებით გადადგმულ ნაბიჯს ვთვლი როგორც სტატუსის წინააღმდეგ საბოტაჟს,"- განაცხადა სამადაშვილმა.
