განათლებისა და მეცნიერების კომიტეტის თავმჯდომარის პირველი მოადგილე გიორგი ჩაკვეტაძე გაეროს ბავშვთა ფონდის საქართველოს წარმომადგენლობის ხელმძღვანელის მოვალეობის შემსრულებელს, ემი ქლენსის შეხვდა. ამის შესახებ ინფორმაციას საქართველოს პარლამენტი ავრცელებს.
მათივე ცნობით, შეხვედრაზე კომიტეტის სამოქმედო გეგმა და საქმიანობის ძირითადი მიმართულებები განიხილეს. ერთ-ერთი მთავარი თემა იყო კომიტეტის მიერ განათლების სექტორში სხვადასხვა მიმართულებით დაგეგმილი თემატური მოკვლევები.
ყურადღება გამახვილდა თემატურ მოკვლევაზე, რომელსაც გიორგი ჩაკვეტაძე ხელმძღვანელობს და შეისწავლის სკოლამდელი აღზრდისა და განათლების დაწესებულებების ინფრასტრუქტურის მდგომარეობისა და ადამიანური რესურსების ხარისხიანი განათლების მიწოდებაზე გავლენის შეფასებას.
„UNICEF-ის როლი ჩვენი ქვეყნის განათლების სისტემაში არის ძალიან მნიშვნელოვანი. შეხვედრაზე განვიხილეთ კომიტეტის თემატური მომკვლევებისა და განათლებისა და მეცნიერების კონცეფციის შემუშავების პროცესში გაეროს ბავშვთა ფონდთან თანამშრომლობის მიმართულებები", - განაცხადა გიორგი ჩაკვეტაძემ.
შეხვედრას ასევე ესწრებოდა UNICEF-ის განათლების ოფიცერი ნინო ფრუიძე.
