საქართველოს პარლამენტის თავმჯდომარის, შალვა პაპუაშვილის თავმჯდომარეობით, ღია მმართველობის მუდმივმოქმედი საპარლამენტო საბჭოს სხდომა გაიმართა.

როგორც პარლამენტის მიერ გავრცელებულ ინფორმაციაშია აღნიშნული, ღია მმართველობის მუდმივმოქმედი საპარლამენტო საბჭოს სხდომაზე ღია პარლამენტის მე-5 სამოქმედო გეგმის (2023-2024წ.წ) პროექტში გაწერილ ვალდებულებებზე იმსჯელეს.

„სხდომაზე პარლამენტის თავმჯდომარემ, ღია მმართველობის მუდმივმოქმედი საპარლამენტო საბჭოს თავმჯდომარემ, შალვა პაპუაშვილმა სამ ვალდებულებაზე გაამახვილა ყურადღება. კერძოდ, პოლიტიკური დებატების ვიდეოჩანაწერების გამოქვეყნებაზე პარლამენტის ვებგვერდზე, ყოველწლიურ კონფერენციაზე პარლამენტის ღიაობის აქტუალურ საკითხებსა და მოქალაქეთა ჩართულობის უზრუნველყოფაზე.

რაც შეეხება პოლიტიკური დებატების ვიდეოჩანაწერების გამოქვეყნების ვალდებულებას პარლამენტის ვებგვერდზე, პაპუაშვილის განცხადებით, აღნიშნული საკითხი შესაძლოა, უფრო ფართო კონტექსტში განიხილონ და მხოლოდ პოლიტიკური დებატების ვიდეოჩანაწერების გამოქვეყნებით არ შემოფარგლონ.

მოქალაქეთა ჩართულობის უზრუნველყოფასთან დაკავშირებით აღებულ ვალდებულებაზე საუბრისას, მოსაზრება საკანონმდებლო წინადადებების განხილვის პროცედურული ნაწილის დახვეწის შესაძლებლობაზე გამოითქვა.

პარლამენტის ღიაობის აქტუალურ საკითხებზე ყოველწლიური კონფერენციის ჩატარების საკითხზე საუბრისას შალვა პაპუაშვილმა განაცხადა, რომ მსგავსი შინაარსის კონფერენციის გამართვა პრობლემას არ წარმოადგენს, თუმცა გამოთქვა მოსაზრება ამ ვალდებულების სამოქმედო გეგმაში ჩანაწერის სახით არსებობის მიზანშეწონილობის შესახებ.

სამივე ვალდებულებასთან დაკავშირებით საბჭოს წევრებმა მოსაზრებები გამოთქვეს. როგორც საბჭოს თავმჯდომარემ განაცხადა, მომდევნო სხდომაზე, რომელიც მიმდინარე კვირაში ჩატარდება, პოზიციების შეჯერება მოხდება.

საბჭომ, ასევე ღია პარლამენტის მე-4 სამოქმედო გეგმის ფარგლებში შემუშავებულ პარლამენტის ყოველწლიური ანგარიშისა და კომიტეტების ანგარიშების ახალ ფორმებზე იმსჯელა, რომელიც საბჭომ მოიწონა.

პარლამენტის ყოველწლიური ანგარიშის და კომიტეტების ანგარიშების ახალი ფორმები დასამტკიცებლად პარლამენტის ბიუროს წარედგინება“, - აღნიშნულია გავრცელებულ ინფორმაციაში.