ირაკლი ქარსელაძე - დაკარგულად მიჩნეული პიროვნების მონაცემები არასწორად იყო მოწოდებული

რეგიონული განვითარებისა და ინფრასტრუქტურის მინისტრის, ირაკლი ქარსელაძის განცხადებით, შოვში, სტიქიის დროს დაკარგულად მიჩნეული ზურაბ ბიბილეიშვილის მონაცემები არასწორად იყო მიწოდებული.

მისი თქმით, აღნიშნული პირის დაკარგვის შესახებ ინფორმაცია მათ ბიბილეიშვილის ახლობელმა მიაწოდა.

"როგორც იცით, უშუალოდ სტიქიასთან დაკავშირებით, ონის მერიაში ჩამოყალიბდა სპეციალური შტაბი შესაბამისი ცხელი ხაზით, სადაც მოქალაქეებს აქვთ შეტყობინების დატოვების შესაძლებლობა. ამ ცხელ ხაზზე დაფიქსირდა შეტყობინება, რომ ვერ ხდებოდა დაკავშირება კონკრეტულ პიროვნებასთან. ბუნებრივია, ჩანიშნული მონაცემების მიხედვით, აღნიშნული პიროვნება შეყვანილი იქნა დაკარგულთა სიაში“, - განაცხადა მინისტრმა.

ირაკლი ქარსელაძის თქმით, შეტყობინებაში მითითებული სახელით და გვარით პიროვნება შესაბამის ბაზებში არ იძებნებოდა, რისთვისაც საჭირო გახდა ინფორმაციის შეტყობინების ინიციატორთან გადამოწმება.

"შეტყობინების ინიციატორთან უკუკავშირი ვერ მოხერხდა და მისი დადგენა შესაძლებელი გახდა მხოლოდ ოპერატიულ-სამძებრო ღონისძიებების საფუძველზე. მონაცემების დაზუსტების შემდეგ, გაირკვა, რომ, როგორც ინიციატორის საკონტაქტო ინფორმაცია, ისე მონაცემები დაკარგულად მიჩნეული პიროვნების შესახებ, არასწორად იყო მოწოდებული.

ამ პიროვნებასთან დაკავშირებული სხვა არავინ გამოჩენილა. არანაირი სხვა წყარო არ არსებობდა. შესაბამისად, იგი, მონაცემების დაზუსტებამდე, რჩებოდა დაკარგულთა სიაში. მონაცემების დაზუსტების შემდეგ, უკვე მოხერხდა პიროვნების შესაბამის ბაზებში დადგენა და უშუალოდ მასთან გასაუბრებით, გაირკვა რომ ის სტიქიის ზონაში არ იმყოფებოდა. შესაბამისად, იგი დაკარგულთა სიაში აღარ არის“, - აღნიშნა ირაკლი ქარსელაძემ.