დედაქალაქის საკრებულოს განათლებისა და კულტურის კომისიის თავმჯდომარის, ისნის რაიონის მაჟორიტარი დეპუტატი კახა ლაბუჩიძის განცხადებით, თბილისი საინვესტიციო კუთხითაც მიმზიდველი ქალაქია და ფაქტი, რომ ის ურბანულად და არქიტექტურულად სწორად ვითარდება, რასაკვირველია, ოპოზიციური პარტიების დამწუხრების მიზეზია. საკრებულოს დეპუტატი ასე გამოეხმაურა ოპოზიციის ბრალდებებს, რომელიც დედაქალაქის ცენტრში ცათამბკენების მშენებლობის საკითხს ეხება.

„დარწმუნებით შემიძლია განვაცხადო, რომ 2024 წლის არჩევნებშიც ისეთივე უპერსპექტივო იქნება ოპოზიცია, როგორიც აქამდე იყო. საზოგადოება ხედავს ქალაქგანვითარებას და სწორედ ეს საზოგადოება გააკეთებს ჩვენს სასარგებლოდ არჩევანს მომავალშიც. რაც შეეხება თქვენს ბრალდებებს, რომ „სირცხვილია ცათამბჯენების შენება ქალაქში“, ამაზე გპასუხობთ: სირცხვილი იყო, როცა აშენებდით მრავალსართულიან საცხოვრებელ კომპლექსებს, რომელთაც არ გააჩნდა რეკრეაცია. სირცხვილი იყო ყოველგვარი პარკირების და საბავშვო სივრცეების გარეშე გაცემული მშენებლობის ნებართვები. სირცხვილი არის ის, რომ ჩვენს მთავარ გამზირზე, რუსთაველზე, წლების წინ გაეცით სამშენებლო ნებართვა, რამაც ქალაქის ისტორიული იერსახე შეცვალა“, - განაცხადა კახა ლაბუჩიძემ.