სახელმწიფო ზრუნავს თავის მოქალაქეებზე იმისთვის, რომ დადგინდეს მათი ადგილსამყოფელი და იყოს უზრუნველყოფილი, რომ ისინი იყვნენ უსაფრთხოდ, - ამის შესახებ პარლამენტის თავმჯდომარემ შალვა პაპუაშვილმა ისრაელში განვითარებულ მოვლენებთან დაკავშირებით განაცხადა.
მისივე თქმით, შეიარაღებული დაპირისპირების დაწყების პირველივე წუთებიდან საქართველოს საელჩო ჩართულია, რათა ჰქონდეს კომუნიკაცია საქართველოს მოქალაქეებთან.
ამასთან, შესაბამის კითხვაზე პასუხისას პარლამენტის სპიკერმა აღნიშნა, მას არ აქვს ინფორმაცია Georgian Airways -ის მიერ ავიაბილეთების ფასის მატებასთან დაკავშირებით.
„თქვენ ნახეთ, პირველივე წუთებიდან საქართველოს საელჩო არის ჩართული იმისთვის, რომ ჰქონდეს კომუნიკაცია საქართველოს ყველა მოქალაქესთან, რომელიც იქ იმყოფება. ის მოქალაქეები, რომლებიც იმყოფებოდნენ სხვადასხვა დროებითი მიზნით ისრაელში, მათთან არის კომუნიკაცია და შესაბამის ზომებს მიიღებს მთავრობა, რომ მათი უსაფრთხოება იყოს უზრუნველყოფილი.
ფასებთან დაკავშირებით ვერაფერს ვერ გეტყვით, არ ვიცი რაზე საუბრობთ.
სახელმწიფოს პოზიციას რაც შეეხება, სახელმწიფო ზრუნავს თავის მოქალაქეებზე იმისთვის, რომ დადგინდეს მათი ადგილსამყოფელი და იყოს უზრუნველყოფილი, რომ ისინი იყვნენ უსაფრთხოდ და ამას საგარეო საქმეთა სამინისტრო საელჩოს მეშვეობით აკეთებს“,- განაცხადა პაპუაშვილმა.