ჩემთვის უპასუხისმგებლო და აბსოლუტურად გაუგებარია „ქართული ოცნებისა“ და სუს-ის უფროსის განცხადება, რომ ფარცხალაძესთან დაკავშირებით მოვითხოვეთ მტკიცებულებები და არ გვაძლევენო, - ამის შესახებ „სტრატეგია აღმაშენებლის“ ერთ-ერთმა ლიდერმა, პაატა მანჯგალაძემ განაცხადა.
მისი თქმით, ეს კიდევ უფრო მეტი არაპროფესიონალიზმია ვიდრე ის, რომ ქართულმა სპეცსამსახურებმა წლების განმავლობაში ვერ გამოავლინეს „რუსეთის ჯაშუში ფარცხალაძე და მასთან დაკავშირებული პირები“.
მანჯგალაძის თქმით, პრობლემა არის ის, რომ გაშიფრულ აგენტ ფარცხალაძეს "ქართულ ოცნებაში" მყოფი გაუშიფრავი აგენტები ვერ დასჯიან.
„აშშ-ს ჰყავს 16 სპეცსამსახურისგან შემდგარი უსაფრთხოების თანამეგობრობა და თუ არცერთი არ გეთანამშრომლება ეს ნიშნავს, რომ არ გენდობა და არ გიმხელს იმ წყაროებს, რომლებმაც გამოავლინა საქართველოში ფარცხალაძის ჯაშუშური საქმიანობა.
ასევე პრიმიტიულია და დანაშაულებრივია ნარატივი, რომ თუ ამერიკა მტკიცებულებებს არ გვაწვდის ე.ი. ფარცხალაძე უდანაშაულოა და სულ ტყუილად დაასანქცირეს, თურმე.
არ დაგვავიწყდეს, საუბარია საქართველოს ინტერესების წინააღმდეგ მოქმედ რუს ჯაშუშზე და იმდენად ჩამოშლილია ჩვენი სტრუქტურა, რომ ჯაშუშის შესახებ ინფორმაციის გავრცელების შემდეგაც ვერ მოიპოვეს აგენტობის და ჯაშუშობის მტკიცებულებები მაშინ, როცა ყველაფერი ხელის გულზე დევს.
სინამდვილეში მთავარი პრობლემა არის ის, რომ გაშიფრულ აგენტ ფარცხალაძეს "ქართულ ოცნებაში" მყოფი გაუშიფრავი აგენტები არ და ვერ დასჯიან", - განაცხადა პაატა მანჯგალაძემ.