კანდიდატის სტატუსს მივიღებთ და ხელისუფლება ეცდება, უდიდეს გამარჯვებად გაყიდოს - ეს დამსახურება „ოცნების“ ხელისუფლებას ვერ უნდა მიეწეროს და არც მიეწერება, - ამის შესახებ პარტია „საქართველოსთვის“ წევრმა, ბერდია სიჭინავამ „პალიტრანიუსის“ გადაცემა „დღის ნიუსრუმში“ განაცხადა.

მისივე თქმით, ოპოზიციის იმ ნაწილს, რომელიც ღიად დეკლარირებს, რომ ქვეყანამ კანდიდატის სტატუსი არ უნდა მიიღოს, „გაჩუმებას ურჩევდა“.

„ნაწილობრივ ვეთანხმები [საგარეო საქმეთა მინისტრს], რომ ოპოზიციის ნაწილი უნდა გაჩუმდეს. ის ნაწილი, რომელიც ღიად დეკლარირებს, რომ ქვეყანამ კანდიდატის სტატუსი არ უნდა მიიღოს. მაგალითად, „ევროპული საქართველო“, მურმან დუმბაძე... არიან ცალკეული პოლიტიკოსები, რომლებიც ღიად დეკლარირებენ, რომ კანდიდატის სტატუსი ბიძინა ივანიშვილს გააძლიერებს... ამ ნაწილში ნამდვილად ვურჩევდი გაჩუმებას, იმიტომ რომ ეს არის უნიკალური შესაძლებლობა, ისტორიას მოვუგოთ დრო და ეს ისტორიული შესაძლებლობა ქვეყანამ უნდა გამოიყენოს. „ოცნება“ ხელისუფლებიდან წავა. გამორიცხულია, რომ „ოცნება“ ხელისუფლებაში დარჩეს, მაგრამ ეს დამსახურება „ოცნების“ ხელისუფლებას ვერ უნდა მიეწეროს და არც მიეწერება. კანდიდატის სტატუსს მივიღებთ და ხელისუფლება ეცდება, უდიდეს გამარჯვებად გაყიდოს,“ - განაცხადა სიჭინავამ.

მისივე თქმით, დარწმუნებულია, რომ საქართველო ევროკავშირის კანდიდატი ქვეყნის სტატუსს მიიღებს, ოღონდ, გარკვეული დათქმებით.

„დარწმუნებული ვარ და იმედი მაქვს, დადებითი გადაწყვეტილება იქნება შეფასების ნაწილშიც და დეკემბერში გადაწყვეტილების მიღების დროს. ჩვენ ხელისუფლებას უნდა დავუწესოთ კონკრეტული მოთხოვნაა, როდის დაიწყება მოლაპარაკებები [გაფართოებასთან დაკავშირებით],“ - აღნიშნა ოპოზიციონერმა პოლიტიკოსმა.

ის ასევე, შესაძლო სამოქალაქო არეულობის საქმეზე სახელმწიფო უსაფრთხოების სამსახურის განცხადებას გამოეხმაურა და განაცხადა, რომ „ნაციონალურ მოძრაობის“ მხრიდან გამორიცხული არაფერია, მაგრამ ეეჭვება, რომ დღეს მას რამის თავი ჰქონდეს.

„ნაციონალურ მოძრაობას“ ისეთი წარსული აქვს, ზოგადად, მისგან გამორიცხული არაფერია, მაგრამ მეეჭვება, მას დღეს რამის თავი ჰქონდეს. ჩვენ როდესაც სუს-ზე ვსაუბრობთ, რომელიც არის ქვეყნის, საზოგადოებრივ უსაფრთხოებაზე პასუხისმგებელი უწყება, ბევრად უფრო მეტის მოლოდინი გვაქვს. მწერლებს, პოეტებს, მსახიობებს და რეჟისორებს კი არ უნდა დასდევდნენ, თუ კონკრეტულად აქვთ ინფორმაცია, რომ ქვეყანაში მნიშვნელოვანი გადატრიალება და არეულობა მზადდება, მათ უნდა ჰქონდეთ მყისიერი რეაგირება,“ - აღნიშნა სიჭინავამ.

ის ასევე, „ერთიანი ნაციონალური მოძრაობის“ წევრების ჭორვილაში ჩასვლასაც შეეხო.

„რა შედეგი მოიტანა ჭორვილაში ჩასვლამ პოლიტიკურად? მივიდნენ, დაახვედრეს ადამიანები, ვერ შევიდნენ. შეკრების და გამოხატვის თავისუფლება არის ფუნდამენტური უფლება, რომლის დასაცავად ყველამ ყველაფერი უნდა გავაკეთოთ, მაგრამ მაშინ, როდესაც საუბარია ჭორვილაში ჩასვლაზე, როდესაც გარდაუვლად იცი, რომ გამოიწვევს მსგავსი ტიპის დაპირისპირებას, იმიტომ რომ საუბარი არის ბიძინა ივანიშვილის, ოლიგარქის სოფელზე... რა პოლიტიკური შედეგის მომტანია, რომ ჩავიდა "ნაციონალური მოძრაობის" ახალი პოლიტიკური ფრთა? რა გააკეთეს? პოლიტიკურმა ძალამ ყველაფერი იმისთვის უნდა აკეთოს, რომ კონკრეტული შედეგი დადოს. თუ ახლა იმისთვის აკეთებენ, რომ მიხეილ სააკაშვილმა რაღაც დავთარში დავალებები გასცა და დაპლიუსდეს ეს დავალება, კიდევ მესმის,“ - განაცხადა ბერდია სიჭინავამ.

გარდა ამისა, მისივე შეფასებით, პარტია „გირჩი - მეტი თავისუფლებაც“ და „დროაც“„ნაციონალური მოძრაობის“ ორბიტაზე მბრუნავი პოლიტიკური პარტიები არიან.

“რა შედეგის მომტანია mona.ge? რაც არ უნდა თქვას ელენე ხოშტარიამ, რომ „ნაციონალური მოძრაობის“ წარმომადგენელი არ არის, ყველამ ვიცით, რომ „ნაციონალური მოძრაობის“ ნაწილი იყო. „ნაციონალური მოძრაობის“ ორბიტაზე მბრუნავი პოლიტიკური პარტიები არიან. ზურაბ გირჩი ჯაფარიძე, რომ „ნაციონალური მოძრაობის“ ორბიტაზე დადის წლების განმავლობაში ეს ვინმეს უკვირს? ან, ელენე ხოშტარიას განსხვავებული დღის წესრიგი არ შეიძლება ჰქონდეს. მესამე ცენტრად რომ გვთავაზობენ ხოლმე ხშირად. ზოგადად, კომიკურია. მოქალაქეების აღქმაში ელენე ხოშტარია მესამე ცენტრია, ან „ნაციონალური მოძრაობის“ ალტერნატივაა? ხომ კომიკურია, სასაცილოა, მაგრამ ცდილობენ, ამაში დაარწმუნონ მოქალაქეები, მაგრამ ამას მოქალაქეები გადაწყვეტენ,“ - განაცხადა სიჭინავამ.