რაც არ უნდა გაერთიანდნენ, მათემატიკის კანონია, შესაკრებთა გადანაცვლებით ჯამი არ იცვლება. რაც არ უნდა გადანაცვლდნენ ეს შესაკრებები, ჩვენ ვერ დაგვამარცხებენ, - ასე შეაფასა „ქართული ოცნების“ თავმჯდომარე, ირაკლი კობახიძემ წინასაარჩევნოდ ოპოზიციური პარტიების შესაძლო გაერთიანება.

როგორც მან განმარტა, ოპოზიციურ პარტიებს ერთმანეთთან საუბარი უჭირთ.

„მათემატიკის კანონი ადასტურებს ამ ყველაფერს. როცა მთელი ოპოზიციის ჯამური რეიტინგი არასდროს აღემატებოდა, ბოლო წელიწად ნახევრის განმავლობაში 45%-ს, ასეთ დროს ჩვენს დამარცხებაზე ლაპარაკი ზედმეტია. ერთადერთი, რაც შეუძლიათ გააკეთონ პარტიებს, გაერთიანდნენ იმისთვის, რომ 5%-იანი ბარიერის გადალახვა სცადონ, თუმცა, უჭირთ ერთმანეთთან დალაპარაკება. მაგალითად, „ლელო“ და გახარია, იყო გარკვეული მცდელობები, თუმცა, უცბად გაახსენდათ, რომ ერთი მეორეს ეძახდა „თაღლითს“, მეორე პირველს ეძახდა „თვალთხარიას“. ასეთ პირობებში, მათ გაერთიანება ძალიან უჭირთ იმიტომ, რომ საზოგადოებას ეს ყველაფერი ახსოვს. ამიტომ არის ხოლმე რთული გაერთიანება. გარდა ამისა, არსებობს ამბიციები სიასთან დაკავშირებით. რაც არ უნდა 5%-იანი ბარიერი გადალახო, გაგყავს პირობითად 8 კაცი პარლამენტში. ამ 8-კაციან სიაზე შეჯერებაც ძალიან უჭირთ. აქედან გამომდინარე, მცდელობები იქნება, თუმცა, რეალურად, ამ პოლიტიკურ კლუბებს გაერთიანება უჭირთ. გაგრძელდება პროცესები და დანარჩენს საზოგადოება დაინახავს. ასევე, იცით, რომ არსებობს ასეთი გეგმა - სალომე ზურაბიშვილი გადადგეს არჩევნების წინ და შეუერთდეს ან გახარიას ან „ლელოს“, ლომჯარია მიამატონ ამას, თუმცა, ლომჯარიათი და ზურაბიშვილით რომ ფონს გახვიდე, აქ ჩანს, რომ ვინც ამას გეგმავს, იმას კარგად არ აქვს დანახული ქართული პოლიტიკა. რეალურად, მძიმედ არის მთლიანად კოლექტიური „ნაცმოძრაობის“ საქმე, მათ შორის იმ პოლიტიკური კლუბების, რომლებიც კოლექტიურ „ნაცმოძრაობასთან“ არიან დაკავშირებული“, - განაცხადა კობახიძემ.