„ქართულ ოცნებას“ ოპოზიციასთან უპირატესობა ისედაც ჰქონდა - ამის მიუხედავად, ბიძინა ივანიშვილის პოლიტიკაში დაბრუნებით მოცემულობა არსებითად იცვლება და არჩევნებში „ქართული ოცნების“ წარმატების პოტენციალი გაცილებით შთამბეჭდავი შეიძლება იყოს, - აღნიშნული განცხადება პარლამენტში უმრავლესობის დეპუტატმა მიხეილ სარჯველაძემ გააკეთა.

როგორც სარჯველაძემ ამ კონტექსტში აღნიშნა, ამ თვალსაზრისით ირაკლი კობახიძის რემარკა მართებულია. მისი თქმით, პასუხი ყველა იმ ოპონენტმა მიიღო, ვინც თვლის, რომ „ბიძინა ივანიშვილის პოლიტიკაში დაბრუნებასთან დაკავშირებით რაიმე ისეთი მიზეზი უნდა მოინახოს, რაც ივანიშვილისთვის ან ხელისუფლებისთვის რაღაც ფორმით დამაზიანებელი შეიძლება აღმოჩნდეს“.

„უნდა ითქვას, რომ ივანიშვილის პოლიტიკაში დაბრუნებას, როგორც ეს მან ახსნა, ოპოზიციასთან მეტი წარმატების მიღწევის სურვილი არ განაპირობებს. მკაფიოდ აიხსნა ყველა ის ფაქტორი, რის გამოც ის პოლიტიკაში დაბრუნდა - ოპოზიცია არის იმდენად კრიტიკულად სუსტი, რომ ეს განაპირობებს იმ საჭიროებას, რის გამოც ბიძინა ივანიშვილმა ეს გადაწყვეტილება მიიღო“, - განაცხადა მიხეილ სარჯველაძემ.

პარტია „ქართული ოცნების“ თავმჯდომარის, ირაკლი კობახიძის განცხადებით, ყოველ ჯერზე, როდესაც ბიძინა ივანიშვილი პოლიტიკაში შემოდიოდა, ეს ოპოზიციის ძალიან მძიმე მარცხით მთავრდებოდა.