სამეგრელო-ზემო სვანეთის რეგიონში ძლიერმა ქარმა და წყალდიდობამ პრობლემები შექმნა. მარტვილში, ქარმა სახურავი მრავალბინიან საცხოვრებელ სახლს გადახადა, ასევე ჩხოროწყუსა და წალენჯიხაში რამდენიმე კერძო სახლს.

ძლიერმა ქარმა ზუგდიდის მუნიციპალიტეტის სოფელ რუხის საჯარო სკოლის სახურავიც დააზიანა, სადაც სასწავლო პროცესი შეწყვეტილია. ქარის შედეგად მოგლეჯილი ხეებისგან გზის სავალი ნაწილები გვიან ღამით გაიწმინდა. ამ დროისთვის ელექტროენერგია არ მიეწოდება სოფლების ნაწილს და მიმდინარეობს აღდგენითი სამუშაოები.

წყალდიდობაა ანაკლიაში. მდინარე ენგური კალაპოტიდან გადმოვიდა და სანაპიროსთან მცხოვრები 7 ოჯახი დაიტბორა.

რაც შეეხება მესტიას, ჯვარი-მესტიის მიმართულებით ყველა სახის ტრანსპორტის მოძრაობა აკრძალულია. წუხელვე მოხდა ზვავის შედეგად ჩაკეტილი 19 მოქალაქის ტერიტორიიდან გამოყვანა.

პრობლემურ ადგილებში არსებულ ვითარებას ადგილზე ეცნობიან სახელმწიფო რწმუნებული გიორგი გუგუჩია და რეგიონის მერები. რეგიონში ყველა მუნიციპალური სამსახური საგანგებო რეჟიმში მუშაობს.