ის, რომ დეპუტატებს მიხეილ სააკაშვილის მონახულების უფლება არ გვეძლევა, ჩვენს საჩივარზე კი სხდომა თვეების განმავლობაში არ ინიშნება, აჩვენებს, რომ მიხეილ სააკაშვილი და ოპოზიცია არის პოლიტიკური შურისძიების მსხვერპლი, - ამის შესახებ ოპოზიციონერმა დეპუტატმა, თამარ კორძაიამ ბრიფინგზე განაცხადა.

მისივე თქმით, ყველა ორგანო - უსაფრთხოების სამსახური, იუსტიციის სამინისტრო, პარლამენტი და სასამართლო ჩართულია იმაში, რომ პარლამენტის წევრმა ვერ მოახერხოს, ვერ შევიდეს და ვერ მოინახულოს მიხეილ სააკაშვილი.

“მინდა ყურადღება გავამახვილო იმ უკანონობასთან დაკავშირებით, რაც ტრიალებს საქართველოს პარლამენტის წევრებთან და მიხეილ სააკაშვილთან მიმართებაში. ერთ წელიწადზე მეტია, პარლამენტის თავმჯდომარემ აკრძალა პარლამენტის წევრების შესვლა მიხეილ სააკაშვილთან მისი მონახულების მიზნით. 2023 წლის 14 აპრილს მე სარჩელი შემიტანე, რადგან ვთვლი, რომ ვალდებული ვარ პარლამენტის წევრის უფლებამოსილება დავიცვა კანონით განსაზღვრული ყველა საშუალებით. მაგრამ დღემდე ვერ მივაღწიეთ იმას, რომ საერთოდ სასამართლო სხდომა ჩანიშნულიყო ამ საკითხთან დაკავშირებით. 7 თვეში უკვე საქართველოს პარლამენტი არ იქნება და შესაძლოა, პარლამენტის წევრის უფლებამოსილება არც გვქონდეს, რაც ნიშნავს, რომ პარლამენტის წევრის უფლებამოსილება ფიქციაა კანონში, რომელშიც წერია, რომ შეგვიძლია ვინახულოთ ნებისმიერი პატიმარი.

პროცესი კი ასე მიმდინარეობდა: როდესაც შალვა პაპუაშვილმა აკრძალა მიხეილ სააკაშვილთან შესვლა, დავიწყეთ გარკვევა. აღმოჩნდა, რომ სუს-ის უფროსმა, ბატონმა ლილუაშვილმა მიმართა იუსტიციის მინისტრს, რატი ბრეგაძეს, რომელმაც ზეპირად მიმართა პაპუაშვილს და მან ზეპირად აკრძალა შესვლა. როდესაც დავა დავიწყეთ, შემდეგ გაფორმდა წერილობითი დოკუმენტები. სასამართლო, რომელიც დღეს ატარებს მოსამართლეთა კონფერენციას იმასთან დაკავშირებით, რომ კეთილსინდისიერი და მიუკერძოებელია, ერთ წელზე მეტია სხდომას არ ატარებს. მე მგონია, რომ ეს ჯაჭვი ნათლად აჩვენებს იმას, რომ მიხეილ სააკაშვილი და ოპოზიცია არის პოლიტიკური შურისძიების მსხვერპლი, რადგან ყველა ორგანო - უსაფრთხოების სამსახური, იუსტიციის სამინისტრო, პარლამენტი და სასამართლო ჩართულია იმაში, რომ პარლამენტის წევრმა ვერ მოვახერხო, ვერ შევიდე და ვერ მოვინახულო მიხეილ სააკაშვილი. ამის უფლება ჩვენ გვაქვს კონსტიტუციურად, კანონმდებლობით და სრულიად დაუსაბუთებლად სისტემური უწესრიგობით, გააზრებული, დაგეგმილი უკანონობით ხდება ამ უფლებების შეზღუდვა”, - აღნიშნა კორძაიამ.

რაც შეეხება თავმჯდომარისა და მმართველი გუნდის განმარტებას, რაც გულისხმობდა, რომ ეს წესი მისივე უსაფრთხოების დაცვისთვის შემოიღეს, ამის საპასუხოდ კორძაიამ განაცხადა, რომ შეზღუდვა რაღაც ეტაპზე შეიძლება იყოს გონივრული, მაგრამ უნდა იყოს ინდივიდუალური და არა ზოგადი.

“დასრულდა ეს პერიოდი. შეზღუდვა რაღაც ეტაპზე შეიძლება იყოს გონივრული, მაგრამ უნდა იყოს ინდივიდუალური და არა ზოგადი. გარდა ამისა, ეს შეზღუდვა მას არ მოუხსნია და არც ხსნის. მაგრამ სასამართლო დავაში მე ვამტკიცებ იმას, რომ მნიშვნელოვანია, რომ დაასაბუთონ კონკრეტული დეპუტატი რატომ არის საფრთხისშემცველი, მაგრამ საქმე იმაშია, რომ ამის დასაბუთებას ვერ ბედავენ და სასამართლო სხდომები არ ინიშნება”, - აღნიშნა თამარ კორძაიამ.