საქართველოს საგარეო საქმეთა მინისტრი ილია დარჩიაშვილი არგენტინაში ოფიციალური ვიზიტის ფარგლებში ეწვია ქალაქ ბუენოს-აირესის საკანონმდებლო ორგანოს, სადაც, ავტონომიური ქალაქის ხელმძღვანელობის გადაწყვეტილებით, მას ბუენოს-აირესის საპატიო სტუმრის ტიტული მიენიჭა.

საგარეო საქმეთა სამინისტროს ცნობით, დაჯილდოების ცერემონიაზე სიტყვით ქალაქ ბუენოს-აირესის ვიცე-პრეზიდენტი მატიას ლოპესი გამოვიდა.

„ღონისძიების მონაწილეებს ასევე მიმართეს საქართველოს საგარეო საქმეთა მინისტრმა, ილია დარჩიაშვილმა და არგენტინაში საქართველოს საგანგებო და სრულუფლებიანმა ელჩმა, გვარამ ხანდამიშვილმა.

ილია დარჩიაშვილმა მადლობა გადაუხადა ქალაქის საკანონმდებლო ორგანოსა და ბუენოს-აირესის პირველ ვიცე-პრეზიდენტს, მატიას ლოპესს. მან ისაუბრა საქართველოსა და არგენტინის ისტორიულ კავშირებზე, რომლებიც თანამედროვე ეპოქაში მტკიცე მეგობრობასა და პარტნიორობაში გადაიზარდა.

ბუენოს-აირესის საკანონმდებლო ორგანოში სტუმრობის ფარგლებში, ხელი მოეწერა თანამშრომლობის მემორანდუმს თბილისის მუნიციპალიტეტის საკრებულოსა და ავტონომიურ ქალაქ ბუენოს-აირესს შორის. დოკუმენტი ხელს უწყობს თბილისის საკრებულოსა და ბუენოს-აირესის საკანონმდებლო ორგანოს შორის ურთიერთობების გაღრმავებას, მუნიციპალური განვითარებისა და თვითმმართველობის საკითხებზე თანამშრომლობის გამყარებას“, - ნათქვამია საგარეო საქმეთა სამინისტროს მიერ გავრცელებულ ინფორმაციაში.