რადიკალური ოპოზიცია და NGO სექტორი საზოგადოებას წინასაარჩევნოდ სთავაზობს ისეთ საქართველოს, სადაც უცხოური შავი ფული იქნება ქართულ პოლიტიკაში, სადაც მოსამართლეებს უცხოელები დანიშნავენ, სადაც ეროვნული იდენტობის მაგივრად, იქნება ლგბტ პროპაგანდა და ხალხის ნაცვლად, მთავრობას აირჩევს უცხოური ძალა NGO-ს მეშვეობით, - ამის შესახებ „ხალხის ძალის" დეპუტატმა, გურამ მაჭარაშვილმა განაცხადა.

მისი შეფასებით, რადიკალური ოპოზიციის „გაუკუღმართებული აზროვნებით“, სუვერენიტეტი სხვა ქვეყნებზე დამოკიდებულებას ნიშნავს.

„აი, ამ საქართველოს სთავაზობს წინასაარჩევნოდ რადიკალური ოპოზიცია ქართულ საზოგადოებას. მათი გაუკუღმართებული აზროვნებით, სუვერენიტეტი ნიშნავს მხოლოდ რუსეთისგან დამოუკიდებლობას და სხვა ქვეყნებზე დამოკიდებულებას. ეს არის მათი გაუკუღმართებული სუვერენიტეტის ცნების განმარტება. ამიტომ, ბუნებრივია ჩვენ ვამბობთ: არა უცხოურ ფულს ქართულ პოლიტიკაში! არა შავ ფულს ქართულ პოლიტიკაში! უცხოური შავი ფული ქართულ პოლიტიკაში ნიშნავს სუვერენიტეტის დანგრევას, ნებისმიერი უცხოური ძალის გუბერნიად გადაქცევას. ჩვენ უნდა ვთქვათ, რომ საბჭოთა კავშირის ნაცვლად, ნებისმიერი უცხოური ძალა თუ დანიშნავს აქ მოსამართლეს, საბჭოთა კავშირის ნაცვლად, ნებისმიერი უცხოური ძალა თუ გაგვიუქმებს ეროვნულ იდენტობას და დაგვინიშნავს მთავრობას, ჩვენთვის არაფერი შეიცვლება. სამწუხაროდ, ჩვენს ოპოზიციას აქვს ასეთი მონური ფსიქოლოგია. „ლელოს“ ერთ-ერთმა წარმომადგენელმა პირდაპირ თქვა, არ წავიკითხავ კანონს იმიტომ, რომ ჩემმა პატრონმა, „არქიფო სეთურმა“ ევროკავშირში თქვა, რომ ეს კანონი ცუდიაო. მერე თუთიყუშივით იმეორებს ყველა ამას, არ გვინდა დეტალებში შესვლა, რადგან „არქიფო სეთურმა“ თქვა, ეს კანონი არის ცუდიო. ე.ი. მათი მენტალური, მონური ფსიქოლოგია წარმოვიდგინოთ, როდესაც ილია ჭავჭავაძის საქართველოში წერა-კითხვა უჭირთ ადამიანებს და კანონებს არ კითხულობენ. ამბობენ, ჩვენ არ გვინდა წერა-კითხვა საქართველოს პარლამენტში თუ მის გარეთ, რასაც იტყვიან ჩვენი პატრონები უცხოეთში, თუნდაც ევროკავშირში, ის უნდა გავიმეოროთო. სამწუხაროდ, აი, ამ დონეზე არიან უკვე რადიკალურ ოპოზიციაში. ეს არის მათი დღის წესრიგი, რასაც ქართული საზოგადოება არ დათანხმდება“,- განაცხადა მაჭარაშვილმა.