ბელგოროდში საცხოვრებელ კორპუსს უკრაინის შეიარაღებული ძალების ჭურვი მოხვდა, რის შედეგადაც მეათედან პირველ სართულამდე სადარბაზო ჩამოინგრა, - ამის შესახებ ოლქის გუბერნატორი, ვიაჩესლავ გლადკოვი „ტელეგრამში“ წერს.

„უკრაინის შეიარაღებულმა ძალებმა ქალაქი ბელგოროდი და ბელგოროდის რაიონი დაბომბა, ხარკოვის გორაზე, ჭურვის პირდაპირი დარტყმის შედეგად, ჩამოინგრა მთელი სადარბაზო, მეათედან პირველ სართულამდე", - აცხადებს გუბერნატორი.

რუსული მედია საგანგებო სიტუაციების სამსახურზე დაყრდნობით იუწყება, რომ დაშავდა, სულ მცირე, 9 ადამიანი. ამჟამად მიმდინარეობს მოსახლეობის ევაკუაცია.

ცნობისთვის, დილით ბელგოროდსა და ბელგოროდის რაიონში სარაკეტო თავდასახმის საფრთხე გამოცხადდა.