ბათუმის საკრებულოს სხდომა ოპოზიციის წევრებმა პროტესტის ნიშნად დატოვეს. ოპოზიციის წარმომადგენლები ხელისუფლებას შანტაჟსა და მუქარაში ადანაშაულებენ.
"ჩემს 8 წლის შვილს ურეკავენ და აგინებენ, ყველა ეს პირი აუცილებლად დაისჯება", - განუცხადა ჟურნალისტებს პარტია “ახალის” წევრმა ნოდარ დუმბაძემ.
მისი თქმით, “ქართული ოცნება” საკუთარ კომფორტზეა ორიენტირებული და ყველაფრის კადრებაზეა გადასული.
“გუშინ ოპოზიციური პარტიების ოფისებზე წარწერები გაჩნდა გვიან ღამით. დაძაბულობა იწვევს იმას, რომ “ქართული ოცნება” ყველაფრის კადრებაზეა გადასული, საკუთარი კომფორტის გარდა არაფერს აკეთებს, მათ ქვეყანა არ აინტერესებთ. ჩვენ გავუშვით შევარდნაძე, გავუშვით აბაშიძე და გავუშვებთ ბიძინა ივანიშვილის. დაისჯება უმკაცრესად ყველა პირი, რომლებიც ჩემს 8 წლის შვილს ურეკავენ და აგინებენ”,- აღნიშნა ნოდარ დუმბაძემ.
კიდევ ერთმა ოპოზიციონერმა, პარტია “საქართველოსთვის” წევრმა აკაკი გვიანიძემ კი განაცხადა, რომ სახელმწიფომ ადამიანების პერსონალური მონაცემების დაცვა უნდა უზრუნველყოს.
თავის მხრივ, ოპოზიცია პროვოკაციაში დაადანაშაულეს "ქართული ოცნების" წევრებმა.