სტრასბურგში, ევროპის საბჭოს საპარლამენტო ასამბლეის ზაფხულის სასესიო კვირა მიმდინარეობს, რომელშიც „მოქალაქეების“ ერთ-ერთი ლიდერი, ქეთევან თურაზაშვილი მონაწილეობს. აღნიშნულის შესახებ ინფორმაციას პარტია „მოქალაქეების“ პრესსამსახური ავრცელებს.

მათივე ცნობით, მიმდინარე კვირაში, საპარლამენტო ასამბლეაში ჩანიშნულია არაერთი დებატი და რეზოლუციების განხილვა, სხვადასხვა აქტუალურ საკითხებზე, მათ შორის - საქართველოში დემოკრატიის გამოწვევების შესახებ, ბოლო პერიოდში განვითარებული მოვლენების კონტექსტში. აგრეთვე, განსახილველ საკითხებშია, რუსული აგრესიის შედეგად უკრაინაში ადამიანის უფლებების დარღვევა.

„ივნისის სასესიო კვირა იმითაცაა მნიშვნელოვანი, რომ მიმდინარე კვირაში ასამბლეა აირჩევს გენერალურ მდივანს, დეპუტატი ქეთევან თურაზაშვილი აქტიურ შეხვედრებს მართავს ამ პოზიციაზე წამოყენებულ კანდიდატებთან.

სტრასბურგში აქტუალურია ე.წ. უცხოური გავლენის შესახებ კანონის ირგვლივ განვითარებული მოვლენები, ამ თემის ირგვლივ შეხვედრები გაიმართება, როგორც წევრი, ისე დამკვირვებელი სახელმწიფოების წარმომდგენლებთან.

საგულისხმოა ისიც, რომ ივნისის სესიამდე, საპარლამენტო ასამბლეის ბიურომ მიიღო გადაწყვეტილება, საქართველოში 2024 წლის საპარლამენტო არჩევნებს დააკვირდეს, რისთვისაც შექმნილია დროებითი კომიტეტი“, - აღნიშნულია ინფორმაციაში.