ჩრდილოეთ კორეა უკრაინის დონეცკის ოლქის რუსეთის მიერ ოკუპირებულ რაიონებში სამხედრო სამშენებლო საინჟინრო ჯარებს გაგზავნის, - ამის შესახებ „ომის შესწავლის ამერიკული ინსტიტუტი“ (ISW) წერს.

მანამდე, ფხენიანის აღნიშნული გეგმის შესახებ ინფორმაცია სამხრეთ კორეულმა ტელეკომპანია TV Chosun-მა, სამხრეთ კორეის მთავრობის წარმომადგენელზე დაყრდნობით, გაავრცელა.

ISW-ისა და TV Chosun-ის ცნობით, ჩრდილოეთ კორეის ჯარები ივლისში უკრაინის ოკუპირებულ რაიონებში გაემგზავრებიან და დონეცკის ინფრასტრუქტურის აღდგენაში ჩაერთვებიან. „ომის შესწავლის ინსტიტუტის“ ინფორმაციით, ჩრდილოეთ კორეის არმიას 10 საინჟინრო ბრიგადა ჰყავს. TV Chosun-ი იუწყება, რომ ფხენიანმა რუსეთისგან, ყოველწლიურად, შესაძლოა, 115 მილიონ დოლარამდე მიიღოს, თუკი ოკუპირებულ ტერიტორიებზე სამ-ოთხ ბრიგადას გაგზავნის.

შეგახსენებთ, 19 ივნისს რუსეთისა და ჩრდილოეთ კორეის ლიდერებმა, ვლადიმერ პუტინმა და კიმ ჩენ ინმა ფხენიანში ორ ქვეყანას შორის სტრატეგიული პარტნიორობის შესახებ შეთანხმებას მოაწერეს ხელი. შეთანხმება ერთ-ერთი მონაწილის მიმართ აგრესიის შემთხვევაში ურთიერთდახმარების უზრუნველყოფას ითვალისწინებს.