უკრაინა მადლიერია მისი თავისუფლებისთვის ბრძოლაში პრეზიდენტ ბაიდენის ურყევი მხარდაჭერისთვის, ყოველთვის მადლობელი ვიქნებით პრეზიდენტ ბაიდენის ლიდერობისთვის, - ამის შესახებ უკრაინის პრეზიდენტმა, ვოლოდიმირ ზელენსკიმ პლატფორმა X-ზე დაწერა მას შემდეგ, რაც აშშ-ის პრეზიდენტმა, ჯო ბაიდენმა საპრეზიდენტო არჩევნებში თავისი კანდიდატურის მოხსნის შესახებ განაცხადა.

„ბევრი ძლიერი გადაწყვეტილება იქნა მიღებული ბოლო წლებში და გვემახსოვრება, როგორც პრეზიდენტ ბაიდენის გაბედული ნაბიჯები, რომლებიც გადადგა რთული პერიოდის საპასუხოდ. ჩვენ პატივს ვცემთ დღევანდელ მკაცრ, მაგრამ მტკიცე გადაწყვეტილებას. ყოველთვის მადლობელი ვიქნებით პრეზიდენტ ბაიდენის ლიდერობისთვის. მან მხარი დაუჭირა ჩვენს ქვეყანას ისტორიის ყველაზე დრამატულ მომენტში, დაგვეხმარა პუტინის მიერ ჩვენი ქვეყნის ოკუპაციის თავიდან აცილებაში და აგრძელებდა ჩვენს მხარდაჭერას მთელი ამ საშინელი ომის განმავლობაში“, - აღნიშნა ზელენსკიმ.

ისრაელის პრეზიდენტმა, ისააკ ჰერცოგმა მადლობა გადაუხადა ბაიდენს ისრაელელი ხალხის მეგობრობისა და მტკიცე მხარდაჭერისთვის და მას ებრაელი ხალხის ჭეშმარიტი მოკავშირე უწოდა. ისრაელის თავდაცვის მინისტრმა იოავ გალანტმა მადლობა გადაუხადა ბაიდენს მხარდაჭერისთვის და განაცხადა, რომ მისი ურყევი მხარდაჭერა, განსაკუთრებით ომის დროს, ფასდაუდებელი იყო.

გაერთიანებული სამეფოს პრემიერის, კეირ სტარმერის განცხადებით, ის პატივს სცემს ბაიდენის გადაწყვეტილებას და მოუთმენლად ელის მასთან მუშაობას მისი პრეზიდენტობის ბოლო თვეებში.

„ვიცი, რომ როგორც ის ამას აკეთებდა თავისი შესანიშნავი კარიერის განმავლობაში, პრეზიდენტი ბაიდენი მიიღებს გადაწყვეტილებას იმის საფუძველზე, რაც მას სჯერა, რომ ამერიკელი ხალხის საუკეთესო ინტერესებშია”, - დაწერა კეირ სტარმერმა პლატფორმა X-ზე.

კანადის პრემიერ-მინისტრმა, ჯასტინ ტრუდომ მადლობა გადაუხადა ბაიდენს კანადისთვის „ნამდვილი მეგობრობის“ გაწევისთვის. ”ის დიდი ადამიანია და ყველაფერი, რასაც აკეთებს, ნაკარნახევია მისი ქვეყნის სიყვარულით,” - დაწერა მან პლატფორმა X-ზე გამოქვეყნებულ პოსტში.

პოლონეთის პრემიერ-მინისტრის, დონალდ ტუსკის განცხადებით, ბაიდენმა რთული გადაწყვეტილებები მიიღო, „რისი წყალობითაც პოლონეთი, ამერიკა და მსოფლიო უფრო უსაფრთხოა და დემოკრატია უფრო ძლიერი. „ვიცი, რომ საბოლოო გადაწყვეტილების გამოცხადებისას თქვენც იგივე მოტივები გამოძრავებდათ“, - დაწერა ტრუდომ X-ზე.

ჯო ბაიდენის გადაწყვეტილებას ეხმაურება იაპონიის პრემიერ-მინისტრი, ფუმიო კიშიდაც.

„თავს ვიკავებ უშუალოდ ამ საკითხზე კომენტარისგან, რადგან ის მოიცავს აშშ-ის შიდა პოლიტიკას, მაგრამ ვაღიარებ, რომ პრეზიდენტ ბაიდენის გადაწყვეტილება ეფუძნება მის სურვილს მიიღოს საუკეთესო პოლიტიკური გადაწყვეტილება,” - აღნიშნა იაპონიის პრემიერმა.