უკრაინა დასავლელი მოკავშირეებისგან, ჩეხეთის ინიციატივის ფარგლებში, კიდევ 100 000 საარტილერიო ჭურვს მიიღებს, - ინფორმაციას უკრაინული მედია ჩეხეთის საგარეო საქმეთა მინისტრ იან ლიპავსკიზე დაყრდნობით ავრცელებს.

მინისტრის ინფორმაციით, მიწოდება უახლოეს ორ თვეშია მოსალოდნელი.

„ივლისისა და აგვისტოს განმავლობაში ჩვენ კიდევ 100 000 საბრძოლო მასალას გავგზავნით. ახლა ვეძებთ თანხებს კიდევ უფრო მეტი საბრძოლო მასალის შესაძენად, რათა ინიციატივის გაგრძელება 2025 წელსაც იყოს შესაძლებელი“, - აღნიშნა ლიპავსკიმ.

ჩეხეთის საგარეო საქმეთა სამინისტროს ხელმძღვანელის თქმით, ინიციატივას 18 ქვეყანა შეუერთდა, მათგან 15-მა უკვე შეასრულა ვალდებულებები და შეიტანა წვლილი, რაც იმას ნიშნავს, რომ საკმარისი თანხა არსებობს იმისთვის, რომ 2024 წლის ბოლომდე უკრაინის შეიარაღებულ ძალებს 500 000 საბრძოლო მასალა მიაწოდონ.