უკრაინის შეიარაღებული ძალების გენერალური შტაბის ინფორმაციით, რუსეთის მხრიდან სარაკეტო თავდასხმის მოგერიებისას F-16 ტიპის მოიერიშე თვითმფრინავმა კატასტროფა განიცადა და მფრინავი დაიღუპა.

„უკრაინის ტერიტორიაზე რუსეთის ფედერაციის სარაკეტო თავდასხმის მოგერიებისას საზენიტო-სარაკეტო ძალების ქვედანაყოფებთან ერთად უკრაინის შეიარაღებული ძალების F-16 ტიპის მოიერიშე თვითმფრინავები გამოიყენეს. საჰაერო ბრძოლის დროს F-16-ებმა მაღალი ეფექტურობა აჩვენეს და მტრის ოთხი ფრთოსანი რაკეტა ჩამოაგდეს. მორიგ სამიზნესთან მიახლოებისას, ერთ-ერთ თვითმფრინავთან კონტაქტი დაიკარგა. როგორც მოგვიანებით გაირკვა, თვითმფრინავმა კატასტროფა განიცადა და პილოტი დაიღუპა“, - აცხადებენ უკრაინის გენშტაბში.

ცნობისთვის, 29 აგვისტოს მედიაში გავრცელდა ინფორმაცია, რომ ნატო-ს მოკავშირეების მიერ უკრაინაში გაგზავნილი F-16 ტიპის ერთ-ერთი მოიერიშე თვითმფრინავი რუსეთის თავდასხმის დროს განადგურდა.