ბიძინა ივანიშვილის პროპაგანდა თითქოს დონალდ ტრამპის გაპრეზიდენტების პირობებში აღდგება საქართველო-ამერიკის ურთიერთობები, არის ტყუილი, მტკნარი სიცრუე, - ამის შესახებ „ერთიანი-ნაციონალური მოძრაობის“ თავმჯდომარემ, თინა ბოკუჩავამ ჟურნალისტებთან საუბრისას განაცხადა.

მისივე თქმით, საქართველო-ამერიკის ურთიერთობის აღდგენის ერთადერთი შანსი არის 26 ოქტომბერს პროევროპული, პროდასავლური არჩევანის გაკეთება.

„როდესაც რესპუბლიკური პარტიის კონგრესზე ვიმყოფებოდი, სადაც დონალდ ტრამპის საპრეზიდენტო კანდიდატად წარდგენა რესპუბლიკური პარტიის მხრიდან მოხდა, „ნაციონალურ მოძრაობა“ ერთადერთი პარტია იყო, რომელიც წარმოდგენილი იყო. ყველა საჯარო კომუნიკაციაში - ყველა რესპუბლიკელი, კონგრესმენი, სენატორი, თუ აღმასრულებელი ადმინისტრაციის წარმომადგენელი ხაზს უსვამდა, რომ ურთიერთობების აღდგენა, ამ ხელისუფლების პირობებში არის შეუძლებელი, მაგრამ საქართველოსა და ამერიკის ურთიერთობების აღდგენა შეგვიძლია ხელისუფლების ცვლილებისთანავე. MEGOBARI აქტის ავტორი არის რესპუბლიკელი კონგრესმენი, ჯო უილსონი. ის ტრამპის მხარდამჭერია, რაც ხაზს უსვამს, რომ ბიძინა ივანიშვილის პროპაგანდა თითქოს დონალდ ტრამპის გაპრეზიდენტების პირობებში აღდგება საქართველო - ამერიკის ურთიერთობები, არის ტყუილი, მტკნარი სიცრუე. საქართველო - ამერიკის ურთიერთობის აღდგენის ერთადერთი შანსი არის 26 ოქტომბერს პროევროპული, პროდასავლური არჩევანის გაკეთებით”, - განაცხადა ბოკუჩავამ.