საზოგადოებრივმა გაერთიანებამ "მოძრაობა კულტურული მემკვიდრეობისთვის" ( საყდრისის კომიტეტი) წარმომადგენლებმა ხულუტის ციხე-დარბაზის გაწმენდა-დასუფთავების სამუშაოები ჩაატარეს.

მათივე გავრცელებული ინფორმაციით, მცენარეული საფარისგან გაიწმინდა ძეგლის ცალკეული ნაწილები, ასევე გაიწმინდა და მოწესრიგდა ძეგლის მიმდებარე ტერიტორია და ძეგლამდე მისასვლელი კიბე-საფეხურები.

XVIII საუკუნის ეროვნული კატეგორიის მნიშვნელობის კულტურული მემკვიდრეობის ძეგლი თეთრიწყაროს მუნიციპალიტეტში მდინარე ქციას( ხრამი) ხეობაში მდებარეობს და ქართული ციხე-დარბაზების ერთ-ერთ უნიკალურ ნიმუშს წარმოადგენს.

აქტივისტების ინიციატივით და სრული მონიტორინგით ხულუტზე სარეაბილიტაციო სამუშაოები (1 მლნ.ლ) სამი წლის განმავლობაში მიმდინარეობდა.

„ხულუტის ციხე-დარბაზის რეაბილიტაცია 2023 წელს დასრულდა და მას შემდეგ ძეგლი რეგიონში ერ -ერთი ყველაზე მოთხოვნად ტურისტულ მარშრუტად იქცა. სამწუხაროდ ბევრი დამთვალიერებელი ასევე ძეგლს დაზიანების რისკების ზრდასაც ნიშნავს. ამიტომ, კიდევ ერთხელ გვინდა მოვუწოდოთ ტურისტულ კომპანიებს, გიდებს, თავად დამთვალიერებლებს - მაქსიმალურად შეიზღუდოს უკონტროლო გადაადგილება ძეგლზე. განსაკუთრებით ციხე-დარბაზის მარანში, სადაც ჯერ კიდევ შემონახულ და დღემდე შეუსწავლელ ქვევრებს დაზიანების საფრთხე ემუქრებათ, - აცხადებს „მოძრაობა კულტურული მემკვიდრეობის“ ხელმძღვანელი ნინო ბურჭულაძე.

ამასთან, როგორც ორგანიზაციაში აღნიშნავენ, დასუფთავების სამუშაოების მორიგი ეტაპი გვიან შემოდგომაზე, ძეგლების გაწმენდა-დასუფთავების საშემოდგომო კამპანიის ფარგლებში ჩატარდება, რომელშიც მოხალისე მოქალაქეებიც იქნებიან ჩართულები.

ორგანიზაციის ცნობით, ხულუტის გაწმენდითი სამუშაოები კულტურული მემკვიდრეობის სტანდარტების დაცვით მიმდინარეობდა.