გერმანიის ბუნდესტაგის საგარეო საქმეთა კომიტეტის თავმჯდომარე, მიხაილ როთი ოპოზიციის წარმომადგენლებს ხვდება. შეხვედრა გერმანიის საელჩოში მიმდინარეობს. როგორც „კოალიცია ცვლილებისთვის" ერთ-ერთმა ლიდერმა, ელენე ხოშტარიამ ჟურნალისტებს განუცხადა, დღევანდელ შეხვედრაზე საუბრის მთავარი თემა საქართველოს ევროკავშირში ინტეგრაცია და 26 ოქტომბრის არჩევნები იქნება.

„მიხაილ როთი ქართველი ხალხის გამორჩეული მეგობარი და ჩვენი ევროპული დღის წესრიგის აქტიური მხარდამჭერია. დღეს, ჩვენ, ოპოზიცია ვალდებული ვართ, ქვეყნის ევროპული დღის წესრიგი განახლდეს და არჩევნების შემდეგ, 27 ოქტომბრიდან ევროპული ინტეგრაციის პროცესი დავიწყოთ. სწორედ ამაზე გვექნება მთავარი აქცენტი, კოალიცია როგორ შეიყვანს საქართველოს ევროკავშირში და როგორი მნიშვნელოვანია მათი მხარდაჭერა ამ ამოცანის განხორციელებაში",-განაცხადა ხოშტარიამ.