უკრაინის საგარეო საქმეთა მინისტრი, ანდრეი სიბიგა დღეს ბუდაპეშტს ეწვევა და თავის უნგრელ კოლეგასთან, პიტერ სიიარტოსთან მოლაპარაკებებს გამართავს, - ინფორმაციას უკრაინული მედია ქვეყნის საგარეო საქმეთა სამინისტროზე დაყრდნობით ავრცელებს.

უწყების ცნობით, საგარეო საქმეთა მინისტრები სხვადასხვა საკითხს განიხილავენ, მათ შორის უკრაინის ევროკავშირსა და ნატო-ში გაწევრიანების მიმართულებით მიღწეულ პროგრესსა და უკრაინის „მშვიდობის ფორმულას“.

„განხილვის ძირითადი თემები იქნება კეთილმეზობლური ურთიერთობების განვითარება, ერთობლივი პროექტების განხორციელება, კერძოდ ეკონომიკის, სასაზღვრო ინფრასტრუქტურის, ეროვნული უმცირესობების უფლებების დაცვის სფეროებში, პროგრესი უკრაინის ევროკავშირსა და ნატო-ში გაწევრიანების მიმართულებით. „მშვიდობის ფორმულა“, როგორც გზა რუსეთის აგრესიის სამართლიანი დასასრულისკენ“, - ნათქვამია საგარეო საქმეთა სამინისტროს განცხადებაში.