ატყუებდნენ საზოგადოებას, რომ ყოველი მეორე „ნაცი“ იყო - თუ ვინმეს რაიმე პრეტენზია აქვს და რაიმე მტკიცებულება არსებობს არჩევნების გაყალბებასთან დაკავშირებით, კეთილი ინებოს და პროკურატურას მიმართოს. ყველა აირიდებს მტკიცებულებების წარდგენას, ვინაიდან ბუნებაში არ არსებობს ასეთი მტკიცებულებები,- ამის შესახებ პრემიერმა, ირაკლი კობახიძემ ოპოზიციაზე საუბრისას განაცხადა.

მისივე თქმით, საზოგადოების უდიდესმა ნაწილმა გააკეთა ის არჩევანი, რაც უალტერნატივო იყო ქვეყნის განვითარებისთვის.

„ისინი ატყუებდნენ ამომრჩეველს, რომ არჩევნებს იგებდნენ. ატყუებდნენ საზოგადოებას, რომ ყოველი მეორე „ნაცი“ იყო, რაც ვერ იქნება სიმართლე. საქართველოს მოსახლეობის უდიდესი ნაწილი აზროვნებს სახელმწიფოებრივად. საზოგადოების უდიდესმა ნაწილმა გააკეთა ის არჩევანი, რაც უალტერნატივო იყო ქვეყნის განვითარებისთვის. ოპოზიციის წარმომადგენლები ატყუებდნენ საზოგადოებას, მათ შორის მხარდამჭერებს, რომ თითქოს, რადიკალური ოპოზიცია არჩევნებს იგებდა, ახლა მათ უწევთ თვალებში ჩახედონ საკუთარ ამომრჩეველს. ისინი ვერ გამოავლენენ ღირსებას, რომ სიმართლე უთხრან მხარდამჭერებს. ახალი ტყუილის საუბარი უწევთ, რომ თითქოს არჩევნები გაყალბდა.

გავაგრძელებთ მტკიცებას მომდევნო დღეების განმავლობაში. ამაში პროკურატურის როლიც მნიშვნელოვანი იქნება. ყველაფერი იქნება გამოძიებული. თუ ვინმეს რაიმე პრეტენზია აქვს, კეთილი ინებოს და პროკურატურას მიმართოს, თუ რაიმე მტკიცებულება არსებობს არჩევნების გაყალბებასთან დაკავშირებით. თავადაც შეგიძლიათ დააკვირდეთ, ნახოთ როგორ წარიმართება პროცესი, ყველა აირიდებს მტკიცებულებების წარდგენას, ვინაიდან ბუნებაში არ არსებობს ასეთი მტკიცებულებები“,- აღნიშნა კობახიძემ.