აშშ-ს ახალ ადმინისტრაციასთან ურთიერთობების გაუმჯობესება უნდა შევძლოთ, რაც, უპირველეს ყოვლისა, ჩვენი ეროვნული ინტერესების უზრუნველსაყოფად აუცილებელია, - ამის შესახებ პროფესორმა და ანალიტიკურ ცენტრ „ჯეოქეისის“ საგარეო პოლიტიკის მიმართულების ხელმძღვანელმა, ხათუნა ბურკაძემ განაცხადა.

მისი განმარტებით, დემოკრატიის უკუსვლა უნდა დასრულდეს და სახელმწიფოებრივი მნიშვნელობის მიზნებზე რეალურად ფოკუსირება უნდა მოხდეს.

„ამერიკის შეერთებული შტატები საქართველოს სტრატეგიული პარტნიორია და, ამავდროულად, სტრატეგიული მოკავშირეა თავდაცვის, უსაფრთხოების სფეროში. შესაბამისად, მშვიდობის დასაცავად, ქვეყნის უსაფრთხოების სისტემის წინაშე არსებული ამოცანების განსახორციელებლად და საქართველოს ევროატლანტიკური მომავლისათვის საჭიროა, ყველა იმ გადაწყვეტილებას გადავხედოთ, რომლებიც საქართველო-ამერიკის ორმხრივი თანამშრომლობისათვის შემაფერხებელ ფაქტორებად იქცნენ.

ამერიკის შეერთებულ შტატებთან სტრატეგიული თანამშრომლობისათვის აუცილებელია ვაჩვენოთ, რომ მზაობა გვაქვს ხელი შევუწყოთ იმ გადაწყვეტილებების მიღებას, რომლებიც ქვეყნის დემოკრატიზაციის პროცესისათვის გადამწყვეტია. სამწუხაროდ, ამ მიმართულებით ჩვენს წინაშე არსებული გამოწვევები მთავარ შემაფერხებელ ფაქტორს წარმოადგენენ საქართველოს საგარეო პოლიტიკური პრიორიტეტების განსახორციელებლად. დემოკრატიის უკუსვლა უნდა დასრულდეს და უნდა შევძლოთ სახელმწიფოებრივი მნიშვნელობის მიზნებზე რეალურად ფოკუსირება“, - განაცხადა ხათუნა ბურკაძემ.

აღნიშნულ ინფორმაციას „ჯეოქეისი“ ავრცელებს.