თბილისის საქალაქო სასამართლოს ეზოში ხმაურია. რამდენიმე წუთის წინ, სამოქალაქო აქტივისტები აქციების მიმდინარეობისას დაკავებულების სოლიდარობის გამოსაცხადებლად მივიდნენ.

როგორც „კოალიცია ცვლილებისთვის“ ერთ-ერთი წევრი აცხადებს, მათ სასამართლოში ბანერები და რუპორი აქვთ მოტანილი, მანდატურის სამსახურმა კი მათი გამოყენების უფლება არ მისცა.

„რუპორი ავიღე, ვეცადე, რომ ჩამერთო, მაგრამ მომცვივდნენ მანდატურები და მითხრეს, რუპორის ჩართვის და აქ შემოტანის უფლება არ გაქვთო. კარებს გარეთ გაგვაგდეს, დაამტვრიეს რუპორი და გადმოვიდნენ ძალადობაზე“, - განაცხადა გელა ხასაიამ.

აქტივისტ მარიამ შუშანიას განმარტებით კი, ისინი „უსამართლოდ დაკავებულ ადამიანებს უცხადებენ სოლიდარობას, სასამართლოში კი ბანერების შემოტანის უფლება არ მისცეს“.

„ძალადობით გაყარეს ბავშვები, იძალადეს, ძირს დააგდეს, ტელეფონები დაგვაყრევინეს... სად წერია, რომ სასამართლოს ეზოში ბანერის შემოტანა არ შემიძლია?“, - აღნიშნა შუშანიამ.

მანდატურის სამსახურის თანამშრომლებმა აქტივისტების ნაწილი სასამართლოს ეზოს გარეთ გაიყვანეს.